Жұмыс үстінде жарақат алған 23 жастағы фельдшер қайтыс болды
АСТАНА. 18 қараша. Астанада адамдарды құтқару кезінде ауыр жарақат алған «жедел жәрдем» фельдшері тілге келмей жантәсілім етті. Бұл туралы Zakon.kz ақпарына сүйенген rast.kz хабарлайды.
«2025 жылғы 8 қарашада Астанада екі фельдшер мен тағы үш адамның үстіне ғимараттың қаптамасы кондиционермен бірге құлаған еді. Бүгін, 18 қараша күні, 23 жастағы фельдшер Ұлдана Мырзуан ауруханада көз жұмды», – делінген хабарламада.
Қайғылы оқиға Астананың Тәуелсіздік даңғылы бойындағы тұрғын үй кешенінде орын алды. Үйдің сыртына орнатылған кірпіш қаптамасы мен кондиционер аспасы жерге құлап түседі. Соның салдарынан бес адам зардап шекті. Фельдшер осында келіп, зардап шеккен жандарға көмектесіп жүргенде өзінің үстіне аталмыш кондиционер құлайды.
Денсаулық сақтау министрі Ақмарал Әлназарова «жедел жәрдем» фельдшері Ұлдана Мырзуанның отбасы мен жақындарына көңіл айтты.
«Денсаулық сақтау министрлігінің атынан және жеке өз атымнан өз кәсіби борышын атқару кезінде қаза тапқан «жедел жәрдем» фельдшері Ұлдана Мырзуанның отбасы мен жақындарына қайғыра көңіл айтамын. 8 қарашада кезекті қызметтік шақырту кезінде Астанадағы тұрғын үй кешенінде ғимараттың қаптамасының бір бөлігі құлады. Өзіне төнген өлім қаупіне қарамастан, Ұлдана екі зардап шеккен адамға көмек көрсетіп, олардың өмірін сақтап қалды. Ол соңғы уақытқа дейін адамдарға көмектесу мақсатына адал болды. Оның іс-әрекеті нағыз кәсіби батырлықтың, қайсарлықтың және жоғары адамгершілік жауапкершіліктің үлгісі», – деп жазды министр Instagram желісіндегі парақшасында.
«Бес жылын медицина саласына арнады, жақында ғана тұрмысқа шығып, болашаққа жоспарлар құрған еді. Бұл қаза тек оның туыстары үшін ғана емес, бүкіл медициналық қауымдастық, әріптестері және елорда тұрғындары үшін де үлкен қайғы. Өзгенің өмірі мен денсаулығын бәрінен жоғары қойған Ұлдана Мырзуанның жарқын бейнесі қайсар да мейірімді жан ретінде біздің жүрегімізде мәңгі сақталады», – делінген Ақмарал Әлназарованың жазбасында.
Мемлекет басшысының Жарлығымен қызметтік борышын үлгілі атқарғаны, қиын-қыстау жағдайда көрсеткен ерлігі мен жанқиярлығы үшін Астана қалалық жедел медициналық жәрдем станциясының фельдшері, марқұм Ұлдана Қалдарханқызы Мырзуан бүгін «Ерлігі үшін» медалімен марапатталды.
Қазір әлеуметтік желіні пайдаланушылар осы тұрғын кешенін тұрғызған құрылыс компаниясының басшыларын қылмыстық жауапқа тарту мәселесін көтеріп жатыр.
