USD
АСТАНА. 29 қыркүйек. Президенттің кеңесшісі, баспасөз хатшысы Мемлекет басшысының соңғы күндері неге бірнеше министрді алмастырғанын айтып берді. Бұл туралы Democrat.kz ақпарына сүйенген rast.kz хабарлайды.
«ҚР президентінің кеңесшісі, баспасөз хатшысы Руслан Желдібай Telegram каналында Президенттің бірнеше лауазым иесін қызметінен не себепті алып тастағанына қатысты жазба жариялады деп жазды», – делінген хабарламада.
Оның баяндауынша, Президент Қасым-Жомарт Тоқаев жуырда жариялаған Жолдауында ұлттық экономикаға түсетін инвестиция көлемін арттыруды басым міндеттің бірі ретінде белгілеген болатын.
«Бұл маңызды сала тәжірибелі дипломат Мұрат Нұртілеуге жүктелді. Президенттің көмекшісі ретінде ол халықаралық инвестициялық және сауда ынтымақтастығын ілгерілету мақсатында шет мемлекеттердің жоғары деңгейдегі өкілдерімен, сондай-ақ әлемдік ірі компаниялардың жетекшілерімен байланысты дамытады», – деп жазды Руслан Желдібай.
Бұған дейін Мұрат Нұртілеу Сыртқы істер министрі болып қызмет атқарып келген еді.
«Мемлекет басшысының Жарлығымен Жаслан Мәдиев Премьер-Министрдің орынбасары – Жасанды интеллект және цифрлық даму министрі болып тағайындалды. Ведомство басшысы Жолдауда айтылған Қазақстанды цифрлық мемлекетке айналдыру жөніндегі мақсатты іске асырумен шұғылданады. Президент министрге стратегиялық маңызы зор жұмысты атқаруға қатысты бағыт-бағдар берді», – деп атап өтті ол сосын.
Сөз соңында Премьер-Министрдің келісімі бойынша Мәжіліс депутаты Жұлдыз Сүлейменованы Оқу-ағарту министрі лауазымына тағайындау туралы шешім қабылданғанын қозғап өтті. Айтуынша, жаңа министрдің қоғамдағы белсенділігі жоғары, ол білім беру саласында да мол тәжірибесі жинақтап үлгерген.
Айта кетуіміз керек, осы күндерде Сыртқы істер министрі болып бұған дейін Премьер-Министрдің орынбасары болып қызмет атқарған Ермек Көшербаев тағайындалды.
