USD
ҚЫЗЫЛОРДА. 21 тамыз. Қызылорда облысында пробация есебінде тұратын балаларға оқу құралдары таратылып берілді. Бұл туралы Polisia.kz ақпарына сүйенген rast.kz хабарлайды.
Жаңа оқу жылы қарсаңында облыстың Сырдария ауданында осындай игі шара қанат қақты. «Сырдария – Нұрдария» қоғамдық қорының қолдауымен әлеуметтік тұрғыдан көмекті қажет ететін отбасыларға, соның ішінде пробация есебінде тұрған азаматтардың 15 баласына мектепке қажетті құрал-жабдықтар мен азық-түлік себеттері тапсырылды.
Балаларға сөмкелер мен оқу құралдары үлестіріліп, жаңа оқу жылына дайындықтары жеңілдетілді. Көмек алған ата-аналар ұйымдастырушыларға ризашылықтарын білдірді.
«Бүгінгі шара аясында балаларыма мектепке қажетті жабдықтар берілді. Енді жаңа оқу жылына толық дайынбыз деп айта аламын. Өзім көп балалы анамын, қазіргі қымбатшылықта барлық баламды мектепке әзірлеу оңай емес. Сол себепті көмекке мұқтаж екенімді айтып, өтініш білдірген едім. Пробация қызметкерлері жағдайымды ескеріп, қолдау көрсетті. Жалпы, пробация қызметі бізге құқықтық та, психологиялық та, әлеуметтік тұрғыдан да үнемі жәрдем беріп келеді», – деді пробация есебінде тұрған азаматша.
Қазіргі таңда Сырдария аудандық пробация қызметінің есебінде 50-ден астам сотталған азамат тіркеуде тұр. Олар заң талаптарына сәйкес қажетті қолдаулармен қамтылып келеді.
