Қызылордада жазасын өтеушілер үшін арнайы дәріс ұйымдастырылды
ҚЫЗЫЛОРДА. 9 тамыз. Кеше Қызылорда облысында жазасын өтеушілер арасында «Қоғамнан шеттетілу» тақырыбы бойынша арнайы дәріс оқылды. Бұл туралы Polisia.kz ақпарына сүйенген rast.kz хабарлайды.
Қызылорда облысы қылмыстық-атқару жүйесі департаментінің №37 мекемесінде жазасын өтеушілермен тәрбиелік бағыттағы іс-шара өткізілді.
Аталған кездесуде Қызылорда облысы дін істері басқармасының теологы Едіге Жұмахметов тақырып бойынша дәріс оқыды.
Сабақ барысында 11 сотталған азаматқа қоғамнан оқшауланудың ұғымы, оның адам өміріндегі әлеуметтік және психологиялық салдарлары жан-жақты түсіндірілді. Теолог кездесуге қатысушылардың сұрақтарына жауап беріп, діни және адами тұрғыдан дұрыс жолды ұстанудың маңыздылығына тоқталды.
Сотталған азаматтар бұл дәрістің өздеріне ерекше әсер еткенін атап өтті.
«Бұл кездесу маған көп ой салды. Қоғамнан алшақтап қалмау үшін ең алдымен өзіміз өзгеруіміз қажет екенін түсіндім. Осындай шаралар бізге дұрыс бағыт береді. Ертең бостандыққа шыққанда, қоғамға бейімделуге көмектеседі», – деді жазасын өтеушілердің бірі.
Мұндай тәрбиелік кездесулер сотталған азаматтардың оң көзқарасын қалыптастыруға және олардың қоғамға қайта бейімделуіне серпін беруді мақсат етеді.
