Қызылордадағы кірпіш зауытында 50-ге жуық сотталған еңбек етеді
ҚЫЗЫЛОРДА. 25 шілде. Қызылорда облыстық қылмыстық атқару жүйесі департаментіндегі (ҚАЖД) кірпіш шығаратын кәсіпорында 50-ге жуық сотталған еңбек етіп жүр. Бұл туралы Polisia.kz ақпарына сүйенген rast.kz хабарлайды.
Департаментке қарасты №60 түзеу мекемесінің өндірістік аймағында күйдірілген кірпіш шығаратын кәсіпорын жұмыс істейді. Бұл — ішкі нарықта үлкен сұранысқа ие өнім.
Бүгінде №60 мекемеде 13 кәсіпорын жұмыс істеп тұр, олардың қатарында 50-ге жуық сотталған еңбек ететін кірпіш өндірісі де бар.
Аталған өндірістік орынға жазасын өтеушілер өз еркімен келеді. I және II топтағы мүмкіндігі шектеулі жандар мемлекеттен әлеуметтік жәрдемақы алатындықтан, жұмысқа тартылмайды. Сол сияқты зейнет жасына жеткен азаматтар да еңбекке қабылданбайды.
«Қалған барлық азаматтарды мүмкіндігінше жұмыспен қамтуға тырысамыз», – дейді сотталғандардың еңбегін ұйымдастыру бөлімінің бастығы Айдана Әбдірейімова.
Жұмысшылардың бірі – А. есімді азамат. Ол сот үкімі шыққанға дейін тұрақты жұмыспен қамтылмаған. Қазіргі таңда кірпіш күйдіру үдерісіне қатысып жүр.
«Мен үшін еңбек – аса маңызды. Себебі жұмыс барысында кері ойлар мен жағымсыз эмоциялардан арыламын. Ең бастысы – уақытымды пайдалы іске жұмсап, өзіме де, қоғамға да пайда әкелемін. Бүгін кірпіш күйдіру жұмысын тәмамдадым. Атқарған еңбегімнің нәтижесін көзбен көру – үлкен қуаныш. Мен өз жұмысымды сүйіп істеймін», – дейді ол.
