Димаш Құдайберген – Қырғызстанның халық әртісі (видео)
ЧОЛПОН-АТА. 24 шілде. Кеше Ыстықкөлдің жағасында өткен халықаралық музыкалық фестивальде қазақ әншісі Димаш Құдайберген «Қырғызстанның халық әртісі» атағын алды. Бұл туралы turmush.kg ақпарына сүйенген rast.kz хабарлайды.
Мемлекеттік хатшы Марат Иманкулов фестивальдің жабылу салтанатында Димаш Құдайбергенге Қырғызстан мен Қазақстан арасындағы достық және мәдени байланыстарды нығайтуға қосқан үлесі үшін «Қырғыз Республикасының халық әртісі» атағын тапсырды. Осыған тиісті жарлыққа Қырғызстан президенті Садыр Жапаров қол қойды. Ол сол сәтте залда отырды.
Халықаралық музыкалық фестивальде Димаш Қанатұлы қырғыз және қазақ халықтары турасында өз ойын айтты. «Қырғыздар – өте талантты халық» деді ол осында өткен баспасөз мәслихатында.
Журналистердің бірі оған қырғыз әншілерімен бірлесіп жасайтын жобаңыз жоқ па, деген сыңайда сұрақ қойды.
«Әзірге қырғыздың әншілерімен жоспарым жоқ, – деді Димаш орысша қойылған сауалға қазақша жауап қайтарып. – Дей тұрғанмен, қырғыздың өте талантты халық екенін жақсы білемін. Және де қырғыздың баяғы, бағзы заманнан бері келе жатқан шығармашылығымен жақсы таныспын. Өзім көп ізденгенді ұнатамын, музыкант болғаннан кейін, әнші болғаннан кейін, осы салада 26 жылдан бері дәріс алып, қызмет етіп жүргеннен кейін барлық жағынан хабардар болуға тырысам. Сол себеппен қырғызша менің ерекше жақсы көретін шығармам «Куйдум чок» деп аталады».
Келесі бір сұрақтың сыңайында жауап бергенде, Димаш былай деді: «Қырғызстан ең алдымен ол – біздің Құдайдан берілген бауырымыз, ең жақын көршіміз. Жалпы, қазақ пен қырғыздың арасында анау айтқандай айырмашылық жоқ деп айтуға болады. Біздің байырғы түбіміз бір. Біз қазіргі отбасы моделі бойынша айтар болсақ, бір ата-ананың егіз екі баласы сияқтымыз».
