Ақмола облысында мәслихат төрағасы отбасына шабуыл жасалды
КӨКШЕТАУ. 15 шілде. Ақмола облысы Астрахан аудандық мәслихатының төрағасы Мейрам Қожахметовтің отбасына қарақшылық шабуыл жасалды. Бұл туралы Dalanews.kz ақпарына сүйенген rast.kz хабарлайды.
Шілденің 15-іне қараған түні қарулы екі адам шенеуніктің үйіне баса-көктеп кіріп, отбасы мүшелерін қорқытып-үркітіп, үйіндегі құнды заттарын үптеп алып кеткен.
Осы оқиғаны жария еткен ақпарат әлеуметтік желіге тарады.
Алдын ала болжам бойынша, бетперде киген екі адам қару қолдарына ұстап, Қожахметовтің жекеменшік үйіне кіріп келген. Қаскөйлер үй иесі мен оның туыстарын жертөлеге қамап, бөлмелерді тінтіп шыққан. Олар ақша, зергерлік бұйымдар мен көлікті алып, оқиға орнынан тез іздерін суытқан.
Ақмола облыстық полиция департаментінің баспасөз қызметі бұл деректі растады. Ведомство мәліметінше, Астрахан ауылында жасалған қарақшылық шабуыл бойынша қылмыстық іс қозғалған.
«Қазіргі уақытта күдіктілердің жеке басын анықтау және оларды ұстау бойынша жедел-іздестіру шаралары жүргізілуде. Бұл қылмысты ашу мәселесі департамент басшылығының ерекше бақылауында», – делінген полиция таратқан ресми хабарламада.
Айта кетейік, мұндай жағдай биыл бірінші рет тіркеліп отырған жоқ. Бұған дейін, 21 сәуірде Шымкент қаласы әкімінің орынбасары Руслан Берденовке де қарулы шабуыл жасалған. Ол бірнеше мәрте атылған оқ салдарынан ауыр жарақат алып, ауруханаға түсті. Шенеунікке сол күні шұғыл ота жасалды.
