USD
АСТАНА. 6 шілде. Қазақстан Президенті Қасым-Жомарт Тоқаев бүгін бокстан Әлем кубогының финаллық жекпе-жектерін көпшілікпен бірге отырып көрді. Бұл туралы Ақорда баспасөз қызметінің дерегіне сүйенген rast.kz хабарлайды.
Әлем кубогының үшінші кезеңі Астана қаласындағы Жақсылық Үшкемпіров атындағы жекпе-жектер сарайында өтті.
World Boxing аясында жалау желбіреткен Әлем кубогы турниріне 29 елден 250 боксшы қатысты. Бұл – рейтингтік жарыс. Жеңімпаздардың әрбір ұпайы олимпиадаға жолдама алуға әсер етеді.
Турнирде Қазақстан құрамасының үздік былғары қолғап шеберлері бақ сынады. Назым Қызайбай, Махмұд Сабырхан, Бекзат Нұрдәулетов, Виктория Графеева және Наталья Богданова World Boxing кубогының алтын медалін жеңіп алды, ал Нұрбек Оралбай мен Алуа Балқыбекова күміс жүлдеге ие болды. Бұған дейін Сағындық Тоғамбай, Аида Әбікеева, Айдана Забынбекова қола жүлде алған еді.
Кешкі бағдарламада Санжар Тәшкенбай чемпион атанды. Бұдан кейін Надежда Рябец, Сабыржан Аққалықов, Елдана Тәліпова және Айбек Оралбай алтын медаль үшін таласады.
Мемлекет басшысы ұлттық құрама боксшыларымен әңгімелесті.
«Жеңістеріңіз құтты болсын! Бокспен тек мықты, күш-жігері мол адамдар шұғылданады. Бұл – ерекше спорт. Баршаңызға сәттілік тілеймін. Мемлекет әрқашан сіздерді қолдайды. Қазақстанда бокстың келешегі зор болатынына ешқандай күмәнім жоқ», – деді Қасым-Жомарт Тоқаев.
