Қызылордада пробациядағы 3 азамат мемлекеттен қайтарымсыз грант алды
ҚЫЗЫЛОРДА. 21 маусым. Қызылордада пробацияда жүрген үш азаматқа мемлекеттің кәсіпкерлік қайтарымсыз гранты берілді. Бұл туралы Polisia.kz ақпарына сүйенген rast.kz хабарлайды.
Қызылорда қалалық пробация қызметінің есебінде тұрған үш тұрғын кәсіпкерлік «Бастау Бизнес» жобасы аясында оқып, өз бизнес-жобаларын сәтті қорғады. Нәтижесінде олар мемлекет тарапынан жалпы сомасы 1 млн 572 мың теңгені құрайтын қайтарымсыз грантқа қол жеткізді.
Аталған азаматтар «Атамекен» кәсіпкерлік палатасында оқытылып, мал шаруашылығы, бетон бұйымдарын өндіру және шұжық өнімдерін шығару бағыттары бойынша бизнес-жоспарларын әзірледі. Жобалары арнайы комиссия алдында мақұлданып, тиісті сертификаттар тапсырылды.
Қызылорда қалалық пробация қызметінің бастығы Фариза Сембаеваның айтуынша, есептегі сотталған азаматтарға тұрақты түрде әлеуметтік-құқықтық көмек көрсетіліп келеді. Соның нәтижесінде өз кәсібін ашуға ниеттілердің қатары артып отыр.
«Пробация есебіндегі азаматтардың жеке кәсіп ашуы – олардың өмірге деген көзқарастарын өзгертіп, қоғамға бейімделуіне сеп болады», – дейді Фариза Сембаева.
«Менің бизнес-жобам қолдау тауып, мемлекеттен қайтарымсыз грант алғаныма қуаныштымын. Алда шұжық өнімдерін шығаратын шағын цех ашып, халыққа сапалы өнім ұсынуды жоспарлап отырмын. Кәсіпкерлікке қадам басуыма мүмкіндік берген жергілікті билік пен пробация қызметіне алғысым шексіз», – деді грант иегері.
