«Еуровидение» конкурсында Аустрия өкілі өкілі жеңіске жетті (видео)

БАЗЕЛЬ. 18 мамыр. Швейцарияның Базель қаласында «Еуровидениенің» 69-шы финалы мәресіне жетіп, ол аустриялық өнер жұлдызының жеңіске жеткенін әйгіледі. Бұл туралы «Новая газета – Европа» ақпарына сүйенген rast.kz хабарлайды.

Конкурс финалында ажырамас махаббат жайлы драмалық баллада болып табылатын «Wasted Love» әнін шырқаған аустриялық контратенор Йоханнес Питч (JJ) бірінші орынға қол жеткізді.

«Махаббат деген – ең қуатты күш. Ендеше осы махаббаттың өркен жаюына түгел атсалысайық», – деді конкурстың жеңімпазы марапат алу сәтінде.

Йоханнес Питч – тегі филиппиндік 24 жастағы әнші. Ол Дубайда өскен, 2016 жылы өзі туған Вена қаласына қайтып оралған. 2020 жылы Британияның «The Voice» және Аустрияның «Starmania» ән-шоуларына қатысқан. Питч – Вена мемлекеттік операсының контратенорі (ерлердің ең жоғары опералық дауысы).

Бұл – аустриялық әншілердің «Еуровидениедегі» үшінші жеңісі. Мұнда бірінші жеңісті 1966 жылы Удо Юргенс алып берсе, екінші жеңіске 2014 жылы Кончита Вурст (Томас Нойвир) жеткен. Мұның соңы үлкен дау болғаны да белгілі.

Дауыс беру

Конкурсқа қатысушы 27 елдің өкілдері екі жүйе бойынша балл жинады: оның бірін қазылар алқасы берсе, екіншісі телекөрермендердің дауыс берулері арқылы қалыптасты. Осылайша олардың рейтингтері түзілді.

Шоудың финалында 26 елдің өкілі өнер көрсетті. Алты қатысушы (конкурсты өткізуші ел мен «Үлкен бестік») финалға автоматты түрде жіберілді, ал қалған 31 әнші жартылай финал арқылы өтті.

Нәтижелер

Кәсіби жюри мүшелерінің дауыс берулері бойынша бірінші орынды – Аустрия, екінші орынды – Швейцария, үшінші орынды – Франция, төртінші орынды – Италия, бесінші орынды Нидерланд алды.

Бірақ көрермендер дауыстарын санағаннан кейін картина қатты өзгеріп кетті. Осылайша 297 ұпай жинаған Израиль әншісі Юваль Рафаэль 15-орыннан бірден бірінші орынға ырғып шықты. Ол ең соңынан Аустрияның нәтижесі хабарланғанша осы қалпын сақтап тұрды. Қорытындыда көрермендерден тағы қосымша 176 ұпай алған аустриялық конкурсты ұтып алды.

Юваль Рафаэльдің жасы да 24-те. Ол 2023 жылы 7 қазанда шекарадағы Газа секторында өткен Nova музыка фестиваліндегі қанды қасаптан әрең аман шыққан әнші. Атып тасталған адамдар мәйіттері арасында өлі жанның кейпін көрсетіп, сегіз сағат жатқан.

Израильдің Газа секторындағы соғысына байланысты құқық қорғаушылар бұл ел өкілдерінің конкурсқа қатысуларына қарсы шыққан. Бірақ ұйымдастырушылар конкурсты жасаушы үкімет емес, KAN телекомпаниясы екенін алға тартып, мұны қабылдамады.

Үшінші орынды эстониялық провокациялы әнші Томми Кэп жеңіп алды. Ол мұнда есте жақсы қалатын «Espresso Macchiato» әнін орындады.

Төртінші орынға Швеция орналасты. Оның KAJ дуэті «Bara Bada Bastu» («Кел, одан да буға түсейік») атты саунаға барудың мәдениеті жайлы мысқыл әні де жоғары балл алды. Букмекерлер көп уақытқа дейін бұған бірінші орынды көрсетіп тұрды.