Каллас «Путин трибуналы» финалдық кезеңге жеткенін айтты
БРЮССЕЛЬ. 8 мамыр. Еуроодақтың сыртқы істер және қауіпсіздік саясаты жөніндегі жоғарғы өкілі Кая Каллас (суретте) «Путин трибуналының» финалы жақын қалғанын баяндады. Бұл туралы DW ақпарына сүйенген rast.kz хабарлайды.
Жоғарғы өкіл 9 мамыр күні Львовта Киевке Ресей шабуылынан қорғану үшін тағы 1 миллиард еуро бөлінетінін айтты. Ол сондай-ақ Украинаға қарсы басқыншылық соғыс қылмыскерлерін соттайтын арнайы трибунал құрудың финалдық кезеңі келіп жеткенін жария етті. Каллас мұның жайын 8 мамыр, бейсенбі күні Варшавада өткен ЕО сыртқы істер министрлерінің бейресми кездесуінде мәлімдеді.
«Ертең біз әскери қылмыстар мен агрессия қылмыстары үшін трибунал құру туралы соңғы саяси растауды береміз», – деді ол. Каллас сондай-ақ Ресейге қарсы «17-ші санкциялар пакеті 20 мамырда өтетін ЕО Сыртқы істер кеңесінің келесі отырысында бекітілетінін» жеткізді.
Франция сыртқы істер министрі Жан-Ноэль Барро 1 мамырда Брюссель жаңа пакеттің мазмұнын Уашингтонмен келісуді жоспарлап отырғанын айтты.
Бұған дейін DW Украинаға қарсы агрессия қылмысы бойынша арнайы трибунал жобасы дайын болғанын және саяси мақұлдауды күтіп тұрғанын хабарлаған еді. Ол бейресми түрде «Путин трибуналы» деп аталады, өйткені халықаралық құқықтануда мемлекеттің ең жоғарғы басшылығы агрессия қылмысы үшін жауапты болып саналады. 9 мамырда Еуроодақ сыртқы істер министрлері Львовқа барады деп күтілуде.
«Бұл механизм бейресми түрде «Путинге арналған трибунал» деп аталса да, қазіргі мемлекет басшысы ретіндегі иммунитет Ресей президентін сот залына жеткіздірмейді», деп атап өтті сарапшылар. Ресей премьер-министрі Михаил Мишустин мен сыртқы істер министрі Сергей Лавров та иммунитетке ие.
Техникалық дайындық наурыз айының соңында Страсбургте өткен «Негізгі топ» деп аталатын жиын барысында аяқталды. Қатысушылар онда Украина мен Еуропа Кеңесі арасындағы екіжақты келісім, трибуналдың жарғысы және оны басқару тәртібі туралы келісім деп аталатын үш құжат әзірледі.
