USD
ШЫМКЕНТ. 21 сәуір. Бүгін әлдекім Шымкент қаласы әкімінің орынбасары Руслан Берденовті атып кетті, зардап шегуші ауруханаға түсті. Бұл туралы Zakon.kz ақпарына сүйенген rast.kz хабарлайды.
«Шымкент қаласы әкімінің орынбасары Руслан Берденов оқ тиіп, ауруханаға түсті», – делінген хабарламада.
2025 жылдың 21 сәуірінде Шымкент қаласы әкімінің орынбасары Руслан Арысбекұлы Берденов бірнеше жерінен оқ жарақатын алған.
Оқыс оқиға қала әкімдігі ғимаратының жанында, сағат 20:30 шамасында орын алған. Аталған оқиғаға қатысты Шымкент қалалық полиция департаментінің баспасөз қызметі түсініктеме берді.
«21 сәуірде Шымкент қаласы әкімдігінің маңында қарудан оқ атылды. Салдарынан әкімдік қызметкері жарақат алып, ауруханаға жатқызылды. Оған барлық медициналық көмек көрсетілуде. Аталған фактіге сәйкес, қылмыстық іс қозғалды. Күдікті ұсталып, уақытша тергеу оқшаулағышына қамалды. Тергеу шаралары қолға алынды. Тергеу барысында аталған оқиғаның барлық мән-жайы анықталатын болады», – делінген баспасөз қызметінің хабарламасында.
Инциденттен кейін мессенджерлер мен әлеуметтік желілерде болған оқиғаның болжамды себептерінің бірі тарай бастады. Онда шабуыл тұрмыстық сипатта, жеке себептермен, соның ішінде қызғаныш жағдайынан туындаған деген жорамал айтылады. Қызғаныш әйелге байланысты тұтанған сияқты.
Сол екі аралықта Руслан Берденовтің партияласы Бейбіт Әлібеков бұл болжамның шындыққа жанаспайтынын жеткізді. Ол шабуыл «Шымкенттің құрылыс саласында тәртіпке келтіру жұмыстары жүріп жатуына байланысты жасалса керек» деген версияны алға тартады.
Бұған қоса, Әлібековтің айтуынша, қала әкімінің орынбасарын атқан күдікті әкімдік жанындағы ЖШС-ның қызметкері көрінеді.
«Оқ Берденовтің өкпесі мен бауырына тиіп кеткен. Бірақ бәрі жақсы болады», – деді ол.
Ресми органдар әзірге қылмыстың жасалуы ықтимал себебі жайлы мәлімдеме жасаған жоқ.
