USD
МӘСКЕУ. 24 наурыз. Ресей әскерлері Белгород облысының Украинамен шекаралас бір селосында бірнеше үйді тонап кеткені паш етілді. Бұл туралы DW ақпарына сүйенген rast.kz хабарлайды.
«Неміс толқыны» радиосы Украина Қарулы күштерімен ұрыс жүріп жатқан Ресей Федерациясының Белгород облысының шекаралас аймағында тонау фактілері орын алғанын баяндады. Жергілікті тұрғындар мұны Ресей сарбаздары жасағандарын айтып берді. Осыдан кейін Кремль билігі өз әскерлерінің тонаушылық әрекеттерімен күресетін патрульдер құруға мәжбүр болды.
Украина Қарулы күштері мен Ресей армиясы арасында шайқас болған Белгород облысының шекаралас елді мекендерінің тұрғындары өз елдері сарбаздарының тонаушылық әрекеттеріне қатысты шағымды көп айта бастады. Мұны облыс билігі ішінара растады.
23 наурызда Ресей күштік құрылымдарына жақын деп танылған «ВЧК-ОГПУ» telegram-арнасы Белгород облысындағы Репяховка селосынан түсірілген видео жариялады. Село Украинаның мемлекеттік шекарасынан 3,5 км қашықтықта орналасқан. Видеода ер адам үйдің астаң-кестеңі шығып жатқанын көрсетіп, «мұнда біздің жауынгерлер келіп кетті» дейді. «Ресей әскерлері бұзып кірген үйлер өте көп», – деп жазды telegram арнасы.
Сол күні «Пепел» ресурсы тілшісінің сұрақтарына жауап берген Репяховка тұрғыны «Кем дегенде 20 үй тоналды, селодағы үйлерде 200 сарбаз тұрып жатыр» дегенді айтқан.
Белгород облысының губернаторы Вячеслав Гладков 23 наурызда telegram желісінде шайқас пен атқылаудың жалғасып жатқанына қарамастан, Репяховка тұрғындарының бір бөлігі селоға егіс алқаптары арқылы келіп жатқанын баяндады. Олардың бірі оқ тиіп жараланған. Шенеуніктің айтуынша, мұнда тұрғындар үйлерінде қалған жан-жануарларына, мысалы, тауықтарына жем беру үшін келеді. «Пепел» олардың басты мақсаттары үйлерін мародерлерден қорғау болып тұрғанын жазады.
Ресейлік Bel.ru порталы 24 наурызда Гладковқа сілтеме жасап, Краснояр ауданында, оның ішінде Репяховкада кем дегенде үш тонау фактісі орын алғанын хабарлады. Қазірдің өзінде ақпарат ішкі істер министрлігі мен әскери полицияға беріліп, тергеу басталды. Жедел штабтың жұмыс тобы билік органдарының, қорғаныс, ішкі істер, төтенше жағдайлар министрліктерінің, өзін-өзі қорғау күштерінің, «Барыс» және «Орлан» құрамаларының өкілдерінен құралды.
