Лондонда Стармер Зеленськийді зор құрметпен қарсы алды
ЛОНДОН. 2 наурыз. Ұлыбритания премьер-министрі Кир Стармер Лондонға мемлекеттік сапармен келген Украина президенті Володимир Зеленськийге қошемет көрсетті. Бұл туралы UNIAN дерегіне сүйенген rast.kz хабарлайды.
Британия үкіметінің басшысы мәртебелі мейманын резиденциясының алдына шығып, өзі күтіп алды.
«Адал, оншалықты қатып қалмаған болып көрінгісі келген Стармер бүкіл әлем, әсіресе, Ақ үй көруі үшін қолдарын жайып, Зеленськийді құшақтай алды. Ол жұрттың бәрі көріп тұрған осы құшақтау мезетін, – АҚШ президенті мен вице-президентінің бұл жөніндегі пікірлері қалай болатынын қаперіне де алмай, – айтарлықтай ұзаққа созып, жанжалдан кейін өзінің кімнің жағында екенін айқын танытты», – делінген материалда.
Осыдан кейін премьер камераның алдында тұрып, Зеленськийді бүкіл Ұлыбританияның толық қолдайтынын және елдің Украинаны «қанша керек болса, сонша уақыт» қолдайтынын атап өтті.
Бұдан бұрын НАТО-ның бас хатшысы Марк Рютте Зеленськийді Трамппен татуласуға шақырған еді. Ол Трамптың 2017-2020 жылдары Украинаға көмек көрсеткен бірінші президент болғанын айтты. Айтуынша, ол сол жылдары Украинаға танкіге қарсы Javelin кешенін сатуға келісім берген екен, 2022 жылы Киеа оны басқыншы жауға қарсы жақсы қолданыпты.
Германияң сыртқы істер министрі Анналена Бербок өз кезегінде Зеленськиймен әдейі жанжал ұйымдастырған Трамп әкімшілігін қатты сынға алды. Осы елдің қазіргі канцлері де, келесі келетін канцлері де, қорғаныс министрі де АҚШ-тың қандай көзқараста болғанына қарамастан, Украинаға әскери көмек беретіндерін мәлімдеді.
Сол сияқты бүгін Кир Стармердің Украина лидерімен бірге Еуропаның көптеген беделді елдерінің басшыларының басын қосып, қалыптасып отырған жағдайды талқылайтын болыпты. Онда Украинаның РФ-мен соғыстан кейінгі қауіпсіздік кепілі мәселесі қаралады. Бұған тек Балтық бойы елдерінің президенттері ғана шақырылмапты.
Кездесуде сондай-ақ Стармер мен Франция президенті Эммануэль Макрон еуропапық одақтастарына АҚШ-қа жақында ғана жасаған сапарлары кезінде Дональд Трамппен болған әңгіменің мазмұнын айтып береді.
Сонымен бірге, Ұлыбританияның Украинаға қорғаныс мұқтаждары үшін 2,26 млрд фунт стерлинг немесе АҚШ-тың 3 млрд доллары көлемінде заем беретіні белгілі болды.
