USD
ХАРБИН. 11 ақпан. Қытайдың Харбин қаласында өтіп жатқан қысқы Азия ойындарында Қазақстан қоржынына бір күнде екі алтын медаль түсті. Бұл туралы olympic.kz ақпарына сүйенген rast.kz хабарлайды.
Бүгінгі күні қазақстандық спортшылар фристайл-акробатика мен биатлоннан тұғырдың ең биік сатысына көтерілді.
Фристайл-акробатикадан Қазақстан ерлер құрамасы ел тарихында алғаш рет Азия ойындарының чемпионы атанды. Атап айтқанда, Роман Иванов пен Шерзод Хаширбаевтан тұратын команда топ жарды. Біздің дуэт өздерінің басты қарсыласы – Олимпиада чемпионы, қытайлық Ци Гуанпу бастаған саңлақтарды артта қалдырды.
Бұл күні сондай-ақ қазақстандық биатлоншылар да бүгін жеңіс тұғырынан табылды. Олар алтын және күміс медальдарды қатар алды. Атап айтқанда, 10 шақырымдық спринтте Владислав Киреев мәреге бірінші болып келсе, Вадим Куралес екінші кезекте жетті. Үшінші орын Қытай спортшысы Гу Цанюға бұйырды.
Айта кету керек, фристайл-акробатикадан қыздар құрамасы да Азия ойындарынан жүлдесіз қайтпады. Мұнда Аяна Жолдас пен Ардана Маханова синхронды секіруде үшінші нәтиже көрсетіп, қола жүлдеге қол созды.
Осылайша, Қазақстан құрамасы Азия ойындарында әзірге үш алтын медальмен турнир кестесінің төртінші сатысында келеді.
