USD
ИСЛАМАБАД. 8 ақпан. Пәкстандағы Сваби университетінің оқымыстылары анар жемісі обырдың жеті түрінің даму тәуекелін төмендетініне көз жеткізді. Бұл туралы Oxu.Az ақпарына сүйенген rast.kz хабарлайды.
Халықаралық ғылыми ұжым құрамында жұмыс істеген Пәкстан университеті ғалымдарының зерттеу қорытындысы анардың мәуесі, қабығы, майы, сығындысы мен шырыны қуық асты безі, қуық, сүт безі, тері, өкпе және тоқ ішек қатерлі ісігінің даму қаупін азайтатынын анықтады.
Зерттеу нәтижелері Food Science & Nutrition (FSN) журналында жарияланған.
Ғалымдардың айтуларынша, анарды пролиферативті, ісікке қарсы және қабынуға қарсы қасиеттермен қамтамасыз етуде антиоксиданттар ерекше рөл атқарады. Оларға полифенол, флавоноид және танин сияқты пайдалы заттар жатады. Бұлар ағзаның жоғарыда аталған жерлеріндегі қабынуды азайтады, ісіктердің пайда болуына жол бермейді және рак жасушаларының өсуін баяулатады.
Бұдан бөлек, ғалымдар бұл жемісті тұрақты пайдаланып тұру обыр метастазының алдын алып, оның дененің басқа бөліктеріне таралып кетуінің жолын кесе алатынын атап көрсетті. Анар сондай-ақ талшықтарға, минералдарға және дәрумендерге бай, ондағы май мен калорияның мөлшері аз. Оны пайдалану қатерлі ісіктің даму қаупін туғызатын факторлардың бірі – артық салмақтан арылуға көмектеседі.
Кейбір зерттеулер анар құрамындағы эллагитаннин ағзаны Альцгеймер және Паркинсон ауруларынан қорғайтынын көрсетеді. Сонымен бірге, анар дәрі-дәрмектердің, соның ішінде гипертонияға арналған препараттардың тиімділігіне әсер етуі мүмкін, сондықтан бұл өнімді әртүрлі ауруларға арналған көмекші терапияның бөлігі ретінде ақырындап қолдану керек.
