USD
БЕЙЖІҢ. 17 қаңтар. Бүгін Қытай көсемі Щи Жиңпиң мен АҚШ-тың жаңадан сайланған президенті Дональд Трамп телефон арқылы сөйлесіп, өзара келісім жасасты. Бұл туралы DW ақпарына сүйенген rast.kz хабарлайды.
«Қытай төрағасы Щи Жиңпиң мен АҚШ-тың жаңадан сайланған президенті Дональд Трамп телефон арқылы сөйлесіп, тұрақты сөйлесіп тұру үшін өзара стратегиялық байланыс каналын құруға келісті», – делінген хабарламада.
DW атап көрсеткендей, оқиға жайын Қытайдың орталық телеарнасы кеңінен баяндаған. Телеарна мәліметінше, байланыс каналы «екі елдің ортақ мүддесі қозғалатын негізгі мәселелерге қатысты» байланысты ұстап тұру үшін қажет.
Телеарнаның хабарлауынша, Щи Жиңпиң мен Дональд Трамп сөз арасында Украина дағдарысы мен Таяу Шығыстағы жағдайды да талқылаған.
«Олар Украина дағдарысы және Израиль-Палестина қақтығысы сияқты екі жақты алаңдаушылық тудыратын негізгі халықаралық және аймақтық мәселелер бойынша пікір алмасты», – деп хабарлады Қытайдың орталық телеарнасы.
Сондай-ақ, Қытай төрағасы Щи Жиңпиңнің АҚШ-тың жаңадан сайланған президентімен телефон арқылы сөйлесуі барысында Бейжің мен Уашингтон Қытай мен АҚШ-тың, сондай-ақ бүкіл әлемнің игілігі үшін серіктестік құрғалы отырғаны атап өтілді.
«Біз серіктес және дос болып, екі елдің және бүкіл әлемнің игілігі үшін өзара табысқа қол жеткізіп, бірге өркендей аламыз», – деп келтіреді телеарна Қытай басшысының сөзін.
АҚШ-тың жаңадан сайланған президенті Дональд Трамп Қытай төрағасы Щи Жиңпиңмен телефон арқылы сөйлескенін өте жақсы нышан деп бағалап, Уашингтон мен Бейжің таяу болашақта көптеген мәселелерді бірлесіп шешеді деген үмітін білдірді.
«Мен жаңа ғана Қытай төрағасы Щи Жиңпиңмен сөйлестім. Әңгімелесу Қытай үшін де, АҚШ үшін де өте пайдалы болды. Біз дәл қазірден бастап көптеген мәселелерді бірге шешеміз деп ойлаймын. Біз сауда балансы, фентанил, TikTok және басқа да көптеген тақырыптарды талқыладық. Төраға Щи екеуміз әлемді бұдан да гөрі бейбіт және қауіпсіз ету үшін қолдан келгеннің бәрін жасаймыз», – деп жазды Трамп.
