USD
МӘСКЕУ. 9 қараша. Украина Қарулы күштерінің 50 ұшқышсыз ұшағы қарашаның 9-ына қараған түні Ресейдің жеті өңіріне соққы берді. Бұл туралы The Moscow News ақпарына сүйенген rast.kz хабарлайды.
РФ қорғаныс министрлігі Украина Қарулы күштерінің 9 қарашаға қараған түні 50 беспилотникті қатыстырумен Ресейге шабуыл жасағанын баяндады. Ведомство бірден жеті өңірдің соққы астында қалғанын атап өтті.
Министрліктің хабарлауынша, дрондардың бәрі атып түсірілген. Атап айтқанда, Брянск облысында – 28, Курскіде 12 ұшқышсыз ұшақ жойылса, Новгород аспанынан – 4, Смоленск мен Тула төбесінен екі-екіден, ал Орел және Тверь көгінен бір-бірден көрінген аппараттар құртылған.
Astra Тула облысындағы Алексин қаласының қатты соққыға ұшырағанын жазып отыр. Жергілікті тұрғындардың айтуларынша, мұнда кемі 11 беспилотник ұшып, ойқастап жүрген. Облыс губернаторы Дмитрий Миляев шабуыл салдарынан бір жеке үйдің зақымға ұшырағанын атап өтті.
РФ қорғаныс министрлігі сияқты, Брянск облысының губернаторы Александр Богомазов пен Новгород облысының басшысы Андрей Никитин де соқққы салдарынан келген залалдар мөлшерін кемітіп көрсетуге күш салған.
Ал Baza Тула облысындағы Алексие химия комбинатына бірден 10 ұшқышсыз ұшақтың шабуыл жасағанын жазды. Оның мәнбелерінің мәліметінше, 1 БПЛА ғана атып түсірілген, қалған 8-і комбинат территориясын көздеп құласа, тағы біреуі жылу-электр станциясын «жастығының астына ала кеткен».
«Қарашаның 8-нен 9-на қараған түні украин беспилотниктері екі айлық үзілістен кейін Ресейдің мұнай өңдеуші зауытына тағы шабуыл жасады. Олардың соққысы астына Саратов облысындағы жылына 7,2 млн тонна мұнай беретін «Ростнефть» мұнай өңдеу зауыты алынды. Нәтижесінде кәсіпорынды өрт шалды», – деп жазды «Диалог.ua».
Сайт Ростов облысындағы полигонға да шабуыл жасалғанын атап өтті. Нәтижесінде нысаннан сау-тамтық қалмай, жермен-жексен болған. Сол сәтті ресейлік әскери қызметкер түсіріп алып, әлеуметтік желіде жариялаған.
