Шерзаттың әкесі Президенттен қолдау мен көмек сұрады

ТАЛҒАР. 15 қазан. Алматы облысы Талғар қаласында қаскөйлер қолынан қаза тапқан 16 жасар Шерзат Полаттың әкесі Қаржаубай Нұрымов Президентке үндеу арнады. Бұл туралы Dalanews.kz ақпарына сүйенген rast.kz хабарлайды.

Қаржаубай Нұрымов осы қайғылы оқиғаға байланысты қазір басқаша айналып алып, ушығып бара жатқан жағдайға байланысты Мемлекет басшысынан көмек сұрауға мәжбүр болған сыңайы бар. Ол осыған байланысты отбасының Алматы облысынан тысқары жерге барып тұруына қолдау көрсетуді өтінеді.

«Әлеуметтік желіде Шерзаттың отбасына қатысты бірқатар даулы ақпарат тарауда. Соның ішінде қайғылы оқиға болар алдындағы видео да бар», – делінген хабарламада.

Видеодан суықты қаруды тек Шерзаттың әкесінің қолынан көруге болады. Қысқаша айтқанда, видео мазмұны атышулы «Нурсултанский соловей» телеграм-арнасында айтылғандай, аталған оқиға тұрмыстық жанжалдан шыққан және оны бірінші болып қайтыс болған жасөспірімнің әкесі мен өзі қозғаған дегенге саяды.

Бұл жағдайларға еш таң қалмайтынын айтқан Шерзаттың әкесі Қазақстанда әділ шешім шығатынына күмәнмен қарайтынын, сондықтан Президенттен, Ішкі істер министрінен отбасын Алматы қаласынан, Алматы облысынан аман-есен алып шығуға қолдау білдіруді сұрады.

«Мен ақталайын деп тұрғаным жоқ. Қорқып та тұрғаным жоқ. Өйткені мен ешкімді өлтірген жоқпын, менің тарапымнан қан шықпады. Шыны керек, қайғы-қасіреттен шаршадым. Мен тек әділ сот болғанын қалаймын. Кінәм болса, мені кінәласын. Бауырымның кінәсі болса, оны да кінәласын. Бірақ менің бір талабым – баламды өлтірген адамдар әділ жазасын алсын!», – деді ол Тик-токта Президент мырзаға жолдаған соңғы үндеу видеосында.

Қаралы әке өзін қаралап жатқанына бек сенімді.

«Менің баламның жарақаттарын да жасырмақшы болды. Сондықтан мен ештеңеге таң қалмаймын қазір. Сондықтан митингі деген нәрсенің керегі жоқ. Мені, менің отбасымды қаралаудың қажеті жоқ. Егер менің баламды өлтірген адамдардың әкелері ер-азамат болса, менің алдыма келер еді. Тик-токқа, инстаграмға үлкен кісілерді шығарып қойып, үйге әйел адамдарды жіберіп қойып, қарап отырмас еді. Сонда мұндай дүрбелеңге бармайтын едік. Менің Президенттен, Ішкі істер министрінен сұрайтыным, отбасыма тыныштық беруін және отбасымды Алматы қаласынан, Алматы облысынан аман-есен алып шығып кетуіме қолдау білдірсе».

Сондай-ақ ол соттың созылатыны айдан анық екенін айтады. Қолындағы пышаққа да қатысты өз ойын айтты.

«Мен қорқып-үркіп тұрғаным жоқ. Олар пышақпен келді, мен енді қалам, қағаз ұстап шықпаймын ғой ондайда. Олардан жалбарынып-жалынып сұрадым. Сол арада қолдарын еркекше беріп кетті. «Болды» деп. Артынан келіп істеп отырған тірліктері анау. Мен, Шерзат, Нұрқанат қана болды бізден. Біз қан төксек, жарайды, айыптап, қараласаңыздар болады. «Қан төкті бұлар, қанішер» деп. Мен қан төккенім жоқ, қан төкпеймін де», – деді ол.

Қаржаубайдың ойынша, мұның барлығы өзінің шындықты айтып қойғанынан болып жатыр.

«Талғар ауданындағы РОВД-дағы, әкімдіктегі, ауруханадағы былықтардың барлығын айтып қойдым. Енді сол үшін өлтіретін болсаңдар өлтіріңдер, соттатсаңдар соттаңдар, атамын десеңдер атыңдар, бірақ отбасыма – ата-анам, іні-қарындастарыма тиіспеңдер. Менің көзім жеткені – Қазақстанда әділетті шешім шықпайды. Тек бір ғана өтініш, Қазақ елінде ешқандай қантөгіс болмасын. Президент мырзадан отбасымды елден аман-есен алып шығуыма мүмкіндік берсе. Мұны бауырларым, ата-анам көрмесін. Ал өзіме не істеймін десеңдер, істей беріңдер. Соңына дейін барамын, заңгерлеріме сенемін. Өйткені анам-әкем деп жылау бір бөлек, ботам деп жылау мүлде басқа әлем. Бір де бір қазақтың қаны ақпасын деп, сабырға келіп, байыппен бәрін ақылға келтіріп отырмын. Айтатыным осы», – деді ол сөзінің соңында.

Айта кетсек, 4 қазанда түнде Талғарда 16 жастағы жасөспірім аса қатыгездікпен өлтірілді. Қайғылы оқиға болған күні Шерзат Полат дүкенде жұмыс істейтін әкесіне көмектескен. Сол күні агрессивті тұтынушы салдарынан төбелес басталып,ақыры қанды оқиғамен аяқталған.

Кәмелетке толмаған баланы өлтіру дерегі бойынша Алматы облысының полиция департаменті қылмыстық іс қозғады.

Әуелгіде кінәлі деп танылған 7 адам ұсталып, уақытша ұстау оқшаулағышына қамалды. Кейін бұлардың қатарына тағы 3 адам қосылып, 10-ға жетті. Тағы 2 адам жөнінде тексеріс жүріп жатыр.

Сонымен қатар, Алматы облыстық полиция департаменті бастығының міндетін атқарушы Шалқаров төбелестен кейін қанша қару тәркіленгенін айтты.

Одан кейін Нұрымовтар тұрып жатқан үйген күзет қойылды.

Көп ұзамай Қаржаубайдың үйі өртеніп, шаңырағы ортасына түсті.