Қазақстан құрамасы әлем чемпионатында Жаңа Зеландияны 10:0 етіп ұтты
ТАШКЕНТ. 21 қыркүйек. Футзалдан Қазақстан құрамасы Өзбекстанда өтіп жатқан әлем чемпионатының топтық турнирінде Жаңа Зеландияны 10:0 етіп ойсырата жеңді. Бұл туралы Livesport ақпарына сүйенген rast.kz хабарлайды.
Біздің жерлестеріміз Ташкенттегі «Humo Arena» спорт кешенінде қарсыластары қақпасына жауапсыз 10 гол салды.
Бұл ойынға Қазақстан сапынан Біржан Оразов пен Дәурен Тұрсағұлов қатыса алмады. Алғашқысы жарақатына байланысты, екіншісі Испаниямен ойындағы қызыл қағазға байланысты тыс қалды.
Ал доптарды Ринат Төреғазин (8), Ақжол Дәрібай(12), Арнольд Кнауб (15,16, 21, 22, 36), Лео Жарагуа (21, 30) салды. Негізінде, Кнауб 31-минутта да бір гол соғып еді, бірақ төрешілер оны автоголға жатқызып жіберді.
Осымен қазақстандықтар топтық кезеңнің ойындарын аяқтады. Олар бірінші турда Испания құрамасымен 1:1 есебімен тең түссе, екінші турда Ливияны 4:1 етіп жеңген еді.
Соңғы турда сондай-ақ Испания құрамасы Ливияны 8:0 есебімен тізе бүктірді. Сөйтіп, доп айырмасын 16-2 еткен испандар топта бірінші орынға шықты. Ал Қазақстан құрамасы 15-2 айырымымен екінші орында қалды.
Енді екі құрама да плей-офф кезеңінде күш сынасады.
1/8 финалда Қазақстан С тобының жеңімпазымен жолығады. Ұлттық құрамамыздың қарсыласы Португалия және Марокко құрамаларының қай жеңгені болады.
Өкінішке қарай, жоқ жерден құрамадағы көшбасшы ойыншылардың бірі Лео Жарагуа қызыл қағаз алды. Ол енді 1/8 финалда алаңға шыға алмайды.
