USD
АЛМАТЫ. 26 тамыз. Кеше, 25 тамыз күні Алматыда заманымыздың заңғар саясаткері Дінмұхаммед Қонаевты еске алу шарасы болып өтті. Бұл туралы өз мәнбесіне сүйенген rast.kz хабарлайды.
Шараға қала тұрғындары мен еліміздің түкпір-түкпірінен келген азаматтар қатысты.
Оның бағдарламасына сай, құнан бәйге, аламан бәйге, садақ ату, теңге алу, қошқар көтеру сияқты ойындар ойналды. Жеңімпаздар мен жүлдегерлерге автокөлік пен басқа да бағалы сыйлықтар тапсырылды. Сонымен қатар, Алматы облысының Сүйінбай атындағы филармониясының әртістері өнер көрсетіп, бағдарламаның мазмұнын байыта түсті.
Салтанатты іс-шарадан соң Дінмұхаммед Қонаевқа арнап ас беріліп, құран бағышталды.
Шараға Астана қаласынан зиялы қауымдардың басын біріктірген «Елдің кеңесі» қоғамдық ұйымының мүшелері де қатысты. Ұйым атынан публицист, жазушы, КР Президенті сыйлығының лауреаты, Қазақстанның еңбек сіңірген қайраткері Бейсенбай Сүлейменов сөз сөйлеп, белгілі мемлекет қайраткері Дінмұхаммед Ахметұлы жайлы естелік айтты. Ол өз сөзінде 1980 жылы «Қазақстан пионері» газетінің 50 жылдығына орай Қонаевтың өз бастамасымен редакцияның бір топ қызметкеріне пәтер алып бергенін әңгімеледі. Соңынан кезінде Қонаевтың жеке күзетін басқарған, бүгінгі шараны ұйымдастырушы Амангелді Шардарбаевтың иығына шапан жапты.
«Елдің кеңесі» ұйымының Астана қаласынан арнайы келген жауапты хатшысы Дәулет Қалиев шараның жақсы ұйымдастырылғанын атап өтті.
