Париж-2024: Мұхаммедсабыр Базарбайұлы Олимпиаданы жеңіспен бастады
ПАРИЖ. 28 шілде. Қазақстан құрамасы сапынан Олимпиада рингіне бірінші болып шыққан 63, 5 келіге дейінгі салмақтағы боксшы Мұхамедсабыр Базарбайұлы (суретте) жеңіске жетті. Бұл туралы Olympic.kz ақпарына сүйенген rast.kz хабарлайды.
Қазақ атлеті 1/16 финалдық іріктеу жекпе-жегінде испаниялық Ойер Ибаррече Кондемен қолғап түйістірді. Жекпе-жектің бірінші раундында біздің бағлан 5:0 есебімен басым түссе, келесі раунда бұл басымдық 4:1 болды, ал соңғы раундта ол тағы қарсыласына бір ұпай да берген жоқ. Нәтижесінде шайқас 5:0 есебімен аяқталды.
Енді Мұхаммедсабыр 1/8 финалдық іріктеу сайысында Тайпейдің Лаи Че атты мықтысымен күш сынасады.
Ал бүгін, 28 шілде, жексенбі күні біздің бес бірдей боксшымыз шаршы алаңға көтеріледі. Атап айтқанда, 51 келіге дейінгі салмақтағы Сәкен Бибосынов түрік Самет Гумушпен, 57 келіге дейінгі салмақтағы Махмұд Сабырхан испаниялық Хосе Бротонс Кильеспен, 71 келіге дейінгі салмақтағы команда капитаны Асланбек Шымбергенов иорданиялық Зейад Эшайшпен, ал 92 келіге дейінгі салмақтағы Айбек Оралбай нигериялық Олайтан Адам Олаормен шайқасады. Ең соңынан 50 келіге дейінгі салмақтағы қызымыз Назым Қызайбай итальян Джиордана Соррентиномен жұдырықтасады.
Бұлардың арасында Айбек 1/8 финалдық айқасын өткізсе, қалғандары 1/16 финалдық іріктеу сынағына қатысады. Жігіттер осы текетірестен өтсе, Сәкен 1/8 финалда Лопес де Хесус (Пуэрто-Рико) – Хасанбой Дусматов (Өзбекстан), Махмұд болса, Небиль Ибрахим (Швеция)/Абусал (Палестина) – Абдумалик Халоков (Өзбекстан) жұптарының ұтқандарымен, Асланбек жапон Сэвонрец Окузавамен, ал Айбек болса, екі түпкілікті кубалық – Әзербайжан атынан түсетін Альфонсо Домингес пен өз елі атынан шығатын Ла Круз Парезаның бірімен ширек финалда айқасады.
Бокс жекпе-жектері бүгін Астана уақытымен 14:00, 18:30, 23:00 сағаттарда басталады.
Бокс турнирінен сағат 14:00-де және 23:00-де «Хабар» телеарнасынан тікелей эфирде трансляция жүргізіледі.
