Қазақстандық теннисші Юлия Путинцева да Ойындарға қатыспайтын болды
ПАРИЖ. 27 шілде. Қазақстандық теннисші Юлия Путинцева да Париж Олимпиадасына қатысудан бас тартты. Бұл туралы Olympic.kz ақпарына сүйенген rast.kz хабарлайды.
Ұлттық Олимпиялық комитет баспасөз қызметінің баяндауынша, Путинцева Парижге ұшып келіп, белсенді түрде жаттыға бастаған. Алайда украин Марта Костюкпен болатын матч алдындағы дайындық кезінде ол тізесін ауыртып алыпты. Медициналық тексеруден өткен соң турнирден бас тарту туралы шешім қабылданады.
Айта кетейік, бұған дейін Юлия тізесіндегі жарақатын айтып, шағымданған екен.
Қазақстан Теннис федерациясының вице-президенті Диас Досқараев осы оқиғаға орай өз ойын айтты.
«Париж Олимпиадасы біз үшін сынақпен басталды. Алдымен Елена Рыбакина сырқатына байланысты турнирден бас тартса, бүгін Юлия Путинцева жарқатына қатысты жарысты тоқтатты. Екі спортшыға да үлкен үміт артқан едік, өкінішті», – деді ол.
