Қызылордада үш күн бұрын жоғалып кеткен дәрігердің денесі табылды
ҚЫЗЫЛОРДА. 24 шілде. Қызылорда қаласында бұдан екі күн алдын із-түзсіз жоғалып кеткені белгілі болған дәрігер жігіттің мүрдесі табылды. Бұл туралы Aikyn.kz ақпарына сүйенген rast.kz хабарлайды.
Мұның алдында еріктілердің 20 шілдеде жоғалып кеткен 25 жастағы ер адамды іздеп жатқандары хабарланған еді.
Хабарламада оның жұмыстан шыққаннан кейін үйіне оралмағаны айтылған. Дәрігер жігіт облыстық көп салалы ауруханада жұмыс істеген.
«ТЖД, ПД қызметкерлерінің, Абылайханның туыстарының және өзге де ерікті азаматтардың күшімен іздеу жұмыстары ұйымдастырылды. Өкінішке қарай, ол өлі күйінде табылды. Иманды болсын! Жас жігіттің неден қайтыс болғаны туралы әзірге белгісіз. Достар, Абылайханды іздеуге атсалысқандардың барлығына рақмет», – деп жазды «Қызылорда еріктілері» қоғамдық қорының атқарушы директоры Ольга Чебакова Facebook парақшасында.
Облыстық полиция департаментінің баспасөз қызметі жоғалған жас жігітті іздеуге екі күн ішінде ПД, полиция басқармасы, ТЖД жеке құрамы, еріктілер мен жергілікті тұрғындар тартылғанын атап өтіп, жас жігіттің қаза тапқаны туралы ақпаратты растады.
«23 шілдеде жоғалған адамның денесі табылды. Бұл факт сотқа дейінгі тергеп-тексерулердің бірыңғай тізілімінде тіркелген. Ер адамның өлімінің нақты себебін анықтау мақсатында қажетті сот-медициналық сараптама тағайындалды және осы сараптаманың қорытындысын күтіп отырмыз. Тұлға анықталды. Тергеу әрекеттері жалғасады. Аймақ полициясы марқұмның жақындары мен туыстарына шын жүректен көңіл айтады», – деп хабарлады ведомствоның баспасөз қызметі.
