USD
САРАЕВО. 7 маусым. Босния және Герцеговинада өтіп жатқан мини-футболдан Еуропа чемпионатының 1/4 финалында Қазақстан құрлық чемпионы Әзербайжан құрамасын ұтты. Бұл туралы Sports.kz ақпарына сүйенген rast.kz хабарлайды.
Осылайша біздің жігіттер Еуропаның іс басындағы чемпионын жарыс жолынан шығарып тастады.
Матчтың негізі уақыты да, овер-таймы да тең аяқталды. Командалар бір-бірінің қақпалары құлпын аша алмады. Нәтижесінде кезек пенальти сериясына келді. Онда қарсыластарын 7:6 етіп тізе бүктірген қазақстандықтардың жолы болып кетті.
Бұған дейін Қазақстан құрамасы чемпионаттың топтық кезеңінде гректерге 0:1 есебімен есе беріп қойса, одан кейін ағылшындарды 7:0 етіп талқандап, Украинаны 3:2 есебімен сүріндірді. Ал плей-оффтық 1/8 финалда Словенияны 1:0 етіп ұтты.
Әзербайжан құрамасы 2023 жылы Еуропа чемпионы атанған еді.
Айта кетейік, 1/4 финалда сондай-ақ Франция Черногорияны 3:2, Сербия Бельгияны 4:0, ал Румыния Босния және Герцеговинаны 4:1 етіп жеңіп шықты.
Енді бүгін Франция – Сербия, Румыния – Қазақстан құрамалары жартылай финалда кездеседі.
