Қуандық Бишімбаев мен Бақытжан Байжановқа қатысты сот үкімі шықты
АСТАНА. 13 мамыр. Әйелін өлтірді деген айып тағылған экс-министр Қуандық Бишімбаев пен қылмысты жасырған Бақытжан Байжановқа қатысты сот үкімі шықты. Бұл туралы Tengrinews.kz ақпарына сүйенген rast.kz хабарлайды.
Астана қаласының мамандандырылған ауданданаралық қылмыстық сотында бұрынғы Ұлттық экономика министрі Қуандық Уәлиханұлы Бишімбаевқа қатысты сот процесі бүгін өзінің мәресіне жетіп, қылмыстық іске соңғы нүкте қойды.
Қорытындыда азаматтық некедегі әйелі Салтанат Нүкенованы азаптап өлтірді деген айып тағылған Қуандық Бишімбаев кінәлі деп танылып, 24 жылға сотталды. Оның тағдырын алқабилер шешті.
«Нәтижесінде Бишімбаевты 24 жылға бас бостандығынан айыру туралы үкім шығарылсын», – деді судья Айжан Құлбаева үкімді оқып.
Алқабилер Бақытжан Байжановты ағасы Қуандық Бишімбаевтың қылмысын жасырғаны үшін кінәлі деп тапты. Осыған байланысты сот Байжановты 4 жылға бас бостандығынан айыру жазасына кесті.
Соттың үкімі әлі заңды күшіне енген жоқ.
Еске сала кетейік, қайғылы оқиға 2023 жылғы 9 қарашада Астанада, бұрынғы Ұлттық экономика министрі Қуандық Уәлиханұлы Бишімбаевтың жеке меншігіндегі «Bau» ресторанында орын алды. Онда әйелі Салтанат Амангелдіқызы Нүкеновамен бірге келіп, бір тәулікке жуық уақыт демалған экс-министр соңында жан төзгісіз қылмысқа барған. Ол жұбайын үздіксіз ұрып-соғып, өлім халіне дейін жеткізген. Таңертең ессіз жатқан әйелге тек кешке бір-ақ «жедел жәрдем» шақырған. Бұл кезде марқұмның әлдеқашан бақилық болып кеткені анықталады. Күдікті тек 11 қараша күні ғана қамауға алынды.
Арада бірнеше күн өткеннен кейін Бишімбаевтың туыс інісі әрі қарамағындағы қызметкері Бақытжан Байжанов қылмысты жасырды деген айыппен тұтқындалды.
Сот процесі барысында Бишімбаевтың анасы – Альмира Нұрлыбекованың активінде бірнеше компания бар екені, соның ішінде қылмыс жасалған ресторанның үстінен қарайтын орталық акцияларының денін ұстап отырғаны белгілі болды.
Ресейлік танымал психиатр Василий Шуров әйелін өлтірді деп айыпталған Бишімбаев пен марқұм Нүкенованың қарым-қатынасын талдап, сотталушыда кездесетін психопат пен абьюзер белгілерін атады.
