Президент қоғамға іріткі салатындардың ешбірі жазасыз қалмайтынын айтты
АСТАНА. 26 сәуір. Президент Қасым-Жомарт Тоқаев қоғамға іріткі салатын әрбір әрекетке тосқауыл қойылатынын қатаң ескертті. Бұл туралы Tengrinews.kz ақпарына сүйенген rast.kz хабарлайды.
Мемлекет басшысы Қазақстан халқы ассамблеясының ХХХІІІ сессиясы отырысында қазақтың мемлекеттігіне қарсы кейбір теріс пиғылды адамдар қарап отырмайтынын айта келіп, ондай әрекеттердің бәріне дер кезінде тиісті жауап беріліп, шара қолданылатынын білдірді.
«Қазіргі күрделі кезеңде елдің бірлігі мен ынтымағын сақтау – ең басты міндет. Біз қоғамға іріткі салатын әрбір әрекетке тосқауыл қоямыз. Мен бұрын да айтқанмын, қазақтың мемлекеттігіне қарсы кейбір теріс пиғылды адамдар қарап отырмайды. «Атың шықпаса, жер өрте» деген. Олар қоғам ішіне іріткі салу үшін әлеуметтік желіде түрлі қитұрқы әрекеттерге баратыны анық. Бір сөзбен айтсақ, халық арасында жалған мәлімет таратады. Сондықтан бәріміз кез келген ақпаратқа сын көзбен қарап, тек ресми мәліметтерге сүйенуіміз қажет», – деді Қасым-Жомарт Кемелұлы.
Кезінде «мың өліп, мың тірілген» халқымыз ел тағдыры сынға түскен сәтте бір алақанның аумағындай жұдырыққа айналып, біріге бірген. Жұрт қайсарлық танытып, ынтымағын сақтай білген. Жанашырлық, тілеулестік сияқты адами қасиеттерді бәрінен биік қойған.
«Біз тарихтың тағы бір сынағынан өтіп жатырмыз. Бірнеше апта бойы халқымыздың бірлігі мен табандылығы және теңдессіз табиғат апатын абыроймен еңсеру қабілеті сынға түсуде», – деді Президент одан әрі.
Қасым-Жомарт Тоқаевтың пайымынша, кез келген дағдарыс біз үшін сынақ қана емес. Ол әрқайсымыздың бойымызда бұғып жатқан күш-қуатымыз бен қарым-қабілетімізді ашып, тың мүмкіндіктер береді.
«Еліміздің өркендеуіне кедергі келтіретін нәрсенің бәрі, ерте ме, кеш пе, тарих қойнауына еніп, келмеске кетеді. Ендеше, қазіргі табиғат апаты байбаламға салып, өмірден түңілетіндей нәрсе емес. Өсіп-өркендеу жолында түрлі кедергі кездеседі. Бірақ оның артынан жақсылық келеді. Бұл алапат тасқын біз үшін жалған жетістікке алданып, «зая кеткен кезеңнен» ажырайтын жолайрық болуға тиіс», –деді Қасым-Жомарт Тоқаев осы ойды түйіндей келіп.
