Алмазбек Атамбаевтың соты жабық жағдайда өтеді

БІШКЕК. 7 наурыз. Қырғызстанның бұрынғы президенті Алмазбек Атамбаевтың соты жабық жағдайда өтетіні белгілі болды. Бұл туралы «Азаттық» хабарлады.

Қырғызстанның экс-президенті өткен жылы Бішкек түбіндегі Қой-Таш елді мекенінде орын алған күштік құрылымдар мен оның жақтастары арасындағы қақтығыстың басты себепкері ретінде айыпталып отыр. Онымен қоса, бұл іске тағы 13 адам тартылып отыр. Атамбаевтың адвокаты Замир Жоошевтің айтуынша, Бішкектің Первомай аудандық соты бірнеше күнге созылған алдын ала тыңдаудан кейін сотты 23 наурызға белгілеген. Оның сөзіне қарағанда, судья Марат Сыдықов қорғау тарабының сотты ашық өткізу туралы өтінішін қанағаттандырмай тастаған.

Адвокаттың айтуынша, отырысқа қоғам өкілдері қатыса алмайды.

Былтыр тамыздың 7-8 күндері Шу облысы Аламудун ауданындағы Кой-Таш ауылында «Алмазбек Атамбаевты тергеуге мәжбүрлеп жеткізу» операциясы кезінде күштік құрылымдар мен саясаткер жақтастары арасында қақтығыс болды. Ауыр жараланған бір арнайы жасақ өкілі көз жұмды, бірнеше адам зардап шекті. 200-ден астам адам түрлі жарақат алды. 8 тамызда Алмазбек Атамбаев пен жақтастары билікке өз еркімен берілді.

Атамбаевты ұстағаннан кейін оған «Жемқорлық» және «Қылмысқа қатысу» және өзге де баптар бойынша ауыр айыптар тағылды, сот шешімімен тергеу оқшаулағышына қамалды. Атамбаев қылмыстық топ жетекшісі Азиз Батукаевтың заңсыз босап шығуы туралы істе де негізгі айыпталушылардың бірі болып отыр.