Тәжікстанда «Крокус» лаңкестерімен байланыстары бар 9 адам ұсталды
ДУШАНБЕ. 29 наурыз. Тәжікстан ұлттық қауіпсіздік комитетінің қызметкерлері «Крокустегі» террорға күдіктілермен қатынастары болған 9 адамды қамауға алды. Бұл туралы Asia-Plus ақпарына сүйенген rast.kz хабарлайды.
Тұтқындалғандар 22 наурызда Мәскеу түбіндегі Красногорск қаласында орналасқан «Крокус Сити Холл» концерт залында теракт жасағандармен және «Ислам мемлекеті» (ИГИЛ –Тәжікстанда тыйым салынған) террорлық ұйымымен байланыстары бар деген күдікке ілінді.
Ақпарды «Азия-Плюстің» Тәжікстан мемлекеттік қауіпсіздік комитетіндегі мәнбесі растады. Бірақ әзірге нақты белгісі тек ұсталғандардың бәрінің Вахдат қаласының тұрғындары екендігі және оларды өткен аптада ұлттық қауіпсіздік комитетінің қызметкерлері қамауға алғандығы ғана.
Мәскеудегі «Крокус Сити Холл» концерт залына шабуыл жасалғаннан кейін күдікті ретінде бірден 8 адам ұсталды. Олардың бәрі 22 мамырға дейін уақытша ұстау оқшаулағышында отырғызылды. Тергеудің мәліметі бойынша, бұлардың бесеуі – Тәжікстан азаматтары, тағы екеуі – республикада туғандарымен Ресей азаматтығын алғандар, тағы біреуі – Қырғызстанда туған Ресей азаматы.
«Крокустегі» терактінің жауапкершілігін «Ислам мемлекеті» террорлық ұйымының «Хорасан уәләяты» бөлімшесі (ұяшығы) өз мойнына алып отыр.
«Азия-Плюс» порталы күдіктінің бірі – 23 жастағы Фаридуни Шамсиддиннің әпкесінің сөзіне сілтеме жасап, тағы бірқатар мағлұмат береді. Әйелдің айтуынша, туыстары 23 наурыздан бері «үйлерінде жоқ», әкесін, анасын, інісін, әйелін 8 айлық баласымен бірге, қайын енесін, ағатайы мен немере ағаларын «ресми киім киген адамдар алып кеткен». Олардың қазір қайда екенін ешкім білмейді.
Суретте: тәжіктің Вахдат қаласы
