Қуандық Бишімбаевтың ісі бойынша алғашқы сот тыңдауы 11 наурызда өтеді
АСТАНА. 1 наурыз. Әйелін асқан қатыгездікпен ұрып өлтірді деп айыпталған экс-министр Қуандық Бишімбаевтың ісі сотта алғащқы рет 11 наурыз тыңдалады. Бұл туралы El.kz ақпарына сүйенген rast.kz хабарлайды.
Сот кабинетіндегі мәнбенің айтуынша, атышулы қылмыстық іс Астана қаласының қылмыстық істер жөніндегі мамандандырылған ауданаралық сотында қаралады. Мұнда осы істегі екінші фигурант – Бақытжан Байжановтың да тағдыры шешіледі.
Тергеу Қуандық Бишімбаевқа Қылмыстық кодекстің 99-бабы 2-бөлігінің 5-тармағы (адам өлтіру, басқа адамға қатысты құқыққа қарсы қасақана аса қатыгездікпен жасалған адам өлтіру), 110-бабы 2-бөлігінің 1-тармағы (ұрып-соғу немесе өзге де зорлық-зомбылық әрекеттері арқылы физикалық және психикалық қинау) бойынша айып тақты. Ал оған осы істе көмектескен Бақытжан Байжанов Қылмыстық кодекстің 432-бабы (аса ауыр қылмысты күні бұрын уәделеспей жасырып қалу), 434-бабы (аса ауыр қылмыс жасағаны туралы хабарламау) бойынша айыпты саналып отыр.
Еске сала кетейік, қайғылы оқиға 2023 жылғы 9 қарашада Астанадағы «Бау» ресторанында орын алды. Онда әйелі Салтанат Нүкеновамен бірге келіп, бір тәулікке жуық уақыт демалған экс-министр Қуандық Бишімбаев соңында жан төзгісіз қылмысқа барған. Ол жұбайын үздіксіз ұрып-соғып, оны өлім халіне дейін жеткізген. Таңертең ессіз жатқан әйелге тек кешке бір-ақ «жедел жәрдем» шақырған. Бұл кезде марқұмның әлдеқашан бақилық болып кеткені анықталады. Күдікті тек 11 қараша күні ғана қамауға алынды.
Қылмыстық істі Астана қаласының қылмыстық істер жөніндегі ауданаралық сотының төрағасы, судья Айжан Құлбаева жүргізеді. Ол бұған дейін журналист Махамбет Абжанға, Еңбек және халықты әлеуметтік қорғау вице-министрі болған Нұржан Әлтаевқа қатысты істерды қараған.
