Бразилия аэропорты Лавровтың ұшағына май құйып беруден бас тартты
РИО-ДЕ-ЖАНЕЙРО. 22 ақпан. Бразилияның Рио-де-Жанейро қаласындағы әуежайы РФ сыртқы істер министрі Сергей Лавровтың ұшағына керосин бермеді. Бұл туралы The Moscow News ақпарына сүйенген rast.kz хабарлайды.
Латын Америкасына турнесі барысында алдымен Куба мен Венесуэлада болған Сергей Лавров соңынан Бразилияда өтетін G20 сыртқы істер министрлерімен кездесуге аттанды. Бірақ мұнда келгесін күтпеген проблемаға тап болды.
AeroTelegraph хабарлағандай, Рио-де-Жанейро әуежайындағылар Лавровтың RA-96019 тіркеу нөмірлі Ил-96 бортын керосинмен қамтамасыз етіп беруден бас тартқан. Мұнда әуе гаванының қызмет көрсетуші Vibra Energia операторы АҚШ-тың Ресей үкіметінің лайнерлерін жабдықтауға тыйым салатын санкциясына сілтеме жасаған.
Нәтижесінде Лавровтың Бразилия президенті Луис Инасио де Силвамен жоспарлы кездесу өткізу үшін Бразилиа қаласына бара алмай қалу қаупі туды.
Соңынан Мәскеуге қайтып кету үшін ұшаққа Бразилия әуе қорғанысы күштерінен керосин құйып алу версиясы қарастырылды. Бірақ әскерилерде оған жеткілікті жағар май болмай шықты.
Ақырында РФ сыртқы істер министріне Бразилиа қаласына бразилиялық әріптесі Мауро Виейраның ұшағына жолай мінген жолаушы секілді ұшып баруына тура келді.
Лавров Мәскеуден Латын Америкасы турнесіне аттанар алдында Батыстың Ресейді оқшауландырып тастау әрекетінен түк шықпағанын айтып, әлемді жайлаған қазіргі хаосқа АҚШ-ты кінәлаған еді.
