USD
МӘСКЕУ. 18 қаңтар. Қашқын ресейліктерге жайылып жастық, иіліп төсек болуда картвельдер көш бастаса, қазақтар олардан кейінгі орынды талассыз алып тұр. Бұл туралы The Moscow News дерегіне сүйенген rast.kz хабарлайды.
«Финион» сарапшыларының Forbes үшін әзірлеген талдауы бойынша, 2023 жылы Ресей азаматтары Сакартвело (Грузия) елінің территориясынан 16 000 (!!!) жаңа компания ашып үлгеріпті. Республика бұл көрсеткіш жағынан келгенде, басқа мемлекеттердің бәрінен қара үзіп, алға дара кетіп отыр.
«Грузия бұрынғысынша ресейліктер үшін ең тартымды да қолайлы бағыттағы дәулет болып қала береді. Мұнда орыстар соғыс басталғалы және мобилизация жарияланған уақыттан бері жаппай қашып келіп жатыр. Бұған елдегі бизнесті тіркеу шарты мен салық жүйесі жақсы әсер етуде», – дейді «Финион» директоры Вячеслав Картамышев.
«Бұған қоса, ресейліктер мен белорустар Грузия банктерінде ашықтан-ашық есепшоттар аша алады, соның ішінде бизнесті дамыту үшін арнайы ашып алуларына болады», – деп түсіндіреді сарапшы.
Ресей азаматтары Украинада соғыс басталған жылы, нақтырақ айтқанда 2022 жылғы ақпаннан 2023 жылдың ақпанына дейін Сакартвелода соның алдындағы 27 жылдан екі есе көп компания ашып үлгерген. Әңгіме бұрынғы 7 788 бен 16 000 жеке кәсіпкерлік жайында болып отыр.
2023 жылы Ресей мұғаджырларының келесі көбірек шоғырланған аумағы Қазақстан жері болды. Мұнда бұрнағы жылы 3500 ресейлік компания тіркелген болса, былтыр ондайлар саны 6100-ге жеткен.
Үшінші орынды Черногория мен Армения тең бөлісіп тұр. Олардың әрбірінде өткен жылы 3400 ресейлік компания ашылған. Бір айта кетерлігі, содан бір жыл алдын Хайастан территориясында 7 328 ресейлік компания тіркелген екен.
Бұдан кейінгі орындарды Сербия, Түркия және Өзбекстан алып отыр.
