USD
АСТАНА. 1 желтоқсан. Мәдениет және ақпарат министрі Аида Балаева ерік өзінде болса, елдегі қазақ контентінің мөлшерін 100 пайызға жеткізуге бейіл екенін баяндады. Бұл туралы Dalanews.kz ақпарына сүйенген rast.kz хабарлайды.
Ведомство басшысы бүгін Мәжілістің жалпы отырысында «Масс-медиа туралы» заң жобасын таныстыру барысыда осылай деді. Ол депутат Қазыбек Иса мемлекеттік тілдегі хабарлардың санын 70 пайызға дейін көбейту туралы ұсынысына жауап берген кезінде өз ойын ірікпей білдірді.
«Қазақ халқының саны 70 пайыздан асып, қазақ тілді мектеп бітірушілердің гранты 70 пайызға жетті. Ал қазақ тілді You Tube арналардың жазылымы өзге тілдерге салыстырғанда, 10 есе көп. Бір ғана «Оян, қазақ!» фильмі рекорд жасап, миллиондаған қаралым жинады. Алайда қазақша оқымайтын қазақ Үкіметі қазақ тіліне деген талаптың өте жоғары екенін қайдан білсін?! Қазақ тілді хабарлардың бәрі ел жатып қалған түн жарымдарда көрсетіледі. Қазақтар түнімен ұйықтамайды деп ойлайсыздар ма? Бұл қазақша хабарлар 70 пайыздан кем болмай, ел көретін уақытта көрсетілуі тиіс. Бұл талапқа қалай қарайсыз?» – деді Қазыбек Иса.
Министр осыған орай елдегі БАҚ-тардың көбісі жекеменшік екенін назар аударып, оларға министрліктің араласуға құқы жоқ екенін алға тартты.
«Бүгінгі таңда 5459 бұқаралық ақпарат құралы ресми тіркелген болса, соның 90 пайызы жекеменшік. Сондықтан бизнес субъектілеріне жатады. Сол себепті Ұлттық экономика министрлігі арнайы сараптама жүргізуде. Соның нәтижесі шыққан соң, өздеріңізге айтатын боламыз. Ал қазақ контентін көбейтуге келсек, маған салса, бәрін 100 қазақша қылар едім», – дейді Аида Балаева.
