Шығыс Қазақстанда Ленин ескерткішінің қиратылуына орай тергеу басталды
ӨСКЕМЕН. 19 тамыз. Шығыс Қазақстан облысының Алтай қаласында Ленин ескерткішінің кездейсоқ қирап қалуына байланысты сот алды тергеуі қолға алынды. Бұл туралы YK-news.kz дерегіне сүйенген rast.kz хабарлайды.
Еске сала кетейік, 15 тамыз күні Алтай қаласының орталық алаңына жаңғырту жұмыстары жүріп жатқанда «пролетариат көсемінің» тас мүсіні күтпеген жерден жерге құлап кетіп, қирап қалған еді. Жаңғырту жобасында аталмыш ескерткіштің тас тұғырын жаңарту да бар екен. Осы жерде тұғырдың плиталары ауыстырылады.
Мердігер мекеме өкілінің айтуынша, ол қайта жаңғырту жұмыстары жүріп жатқан кезде бір жеріне залал келмеуі үшін ескерткішті алып қоюды ұсынған көрінеді. Алайда жұмыс барысында, оның сөзінше, ескерткіштің «өзі құлап кеткен». Ал әлеуметтік желіге тараған видеодан жүк көтергіш техниканың ескерткішке тиіп кеткені анық көрініп тұр…
«Аталған дерек бойынша, ҚР Қылмыстық колексінің 203-бабы 1-бөлігі бойынша (тарих, мәдениет ескерткіштерін, табиғи кешендерді немесе мемлекет қорғауға алған объектілерді, сондай-ақ ерекше тарихи, ғылыми, көркемдік немесе мәдени құндылығы бар заттарды немесе құжаттарды қасақана жою немесе бүлдіру) сотқа дейінгі тергеу басталды. Жаза ретінде үш жылдан жеті жылға дейін бас бостандығынан айыру қарастырылған», – деп хабарлады Шығыс Қазақстан облыстық полициясының баспасөз қызметіндегілер.
