Қырғыз президенті шенеуніктерге қырғызша сөйлеуді міндеттеді
БІШКЕК. 18 шілде. Қырғыз Республикасының президенті Садыр Жапаров мемлекеттік қызметкерлердің бәріне қырғыз тілін білуді міндеттейтін заңға қол қойды. Бұл туралы The Moscow News ақпарына сүйенген rast.kz хабарлайды.
Әңгіме депутаттар, әскери қызметкерлер, судьялар, адвокаттар, нотариустер, педагогика және ғылым қызметкерлері, сондай-ақ ұлттық банк, жоғары оқу орындары мен денсаулық сақтау саласының қызметкерлері жайлы болып отыр.
Құжатқа сәйкес, қырғыз тілі мемлекеттік тіл ретінде мына салаларда міндетті түрде қолданыста болады:
– мемлекеттік органдар, жергілікті өзін өзі басқару органдары, меншік түрлерінің барлық пішініндегі кәсіпорындар, мекемелер мен ұйымдар қызметтерінде;
– сайлаулар мен реферандумдарды дайындау мен өткізу үдерісінде;
– сот ісінде, Қарулы күштерде, құқық қорғау органдарында;
– халықаралық келіссөздер жасасу кезінде;
– нормативті актілерді жасау кезінде, іс өндірісінде және құжат айналымында;
– географиялық атауларда және топономика нысандары аттарында, адамдар аттарында;
– тауарлар мен қызметтер туралы хабарламаларда;
– нотариалды кеңселерде, құжаттарды тіркеу кезінде;
– білім беру, ғылым, мәдениет салаларында, бұқаралық ақпарат құралдарында, кітап басу ісінде, жарнамада, көлікте.
Бұдан бөлек, телерадиокомпаниялар, соның ішінде жекеменшік компаниялар хабарларының кем дегенде 60 пайызын мемлекеттік тілде жүргізуге міндетті, ал сайттардың қырғыз тіліндегі нұсқаларындағы ақпараттар басқа тілдердегі нұсқалардан кем болмауы тиіс.
Заң сондай-ақ шетел ұйымдарымен бірлескен компаниялардың атаулары транслитерациясын мемлекеттік тілде толтыруды міндеттейді.
Республиканың қырғыз тілін білмейтін азаматтарының мемлекеттік қызмет жүйесіндегі жұмысы шектелуі мүмкін.
Ал басқа тілдер өз аясында дами береді, оларға ешкім тосқауыл қоймайды.
Конституцияға сәйкес, орыс тілі республикада ресми тіл болып қала береді. Әзірге.
