USD
ҚЫЗЫЛОРДА.17 шілде. Сыр бойындағы бас қалада «Жастарға – жұмыс» атты бос жұмыс орындары жәрмеңкесі өткізілді. Бұл туралы Қызылорда облыстық қоғамдық даму басқармасының ақпарына сүйенген rast.kz хабарлайды.
Жәрмеңке жастар арасындағы жұмыссыздықты жою мақсатында ұйымдастырылды. Ол азаматтардың біліктілігіне сәйкес жұмысқа орналасуына ықпал жасауды қарастырды. Шара сондай-ақ студент жастардың бос уақыттарын тиімді ұйымдастыруға, еңбекке баулу арқылы маусымдық жұмыстарға тартуға арналды.
Биылғы оқу жылында облыс көлемінде техникалық және кәсіптік білім беру мекемелерінің өзінен барлығы 5624 жас маман шығады. Сондықтан жастардың жұмысқа орналасуы, мемлекеттік бағдарламалар арқылы алғашқы тәжірибелерін жинақтаулары үшін «Жастар практикасы», «Қоғамдық жұмыс» секілді бағдарламалар жөнінде ақпарат ұсынылды.
Жәрмеңке аясында 20-дан астам мекеме мен кәсіпорыннан түскен 150 бос жұмыс орнына сұраныс бойынша іріктеу жүргізілді.
Шараға барлығы 192 азамат қатысты. Олардың 52-сі кеңес алды, 27-сіне сұхбаттасуға жолдама берілді, 18 адам тікелей жұмысқа орналасатын болды, ал 7 талапкер маусымдық жұмысқа тартылды.
Жансая НҰРҚОЖА
