USD
МӘСКЕУ. 15 шілде. РФ федералды қауіпсіздік қызметі (ФСБ) z-насихатшылар Маргарита Симоньян мен Ксения Собчакты өлтіру үшін әзірленіп жатқан актіні әшкереледі. Бұл туралы ТАСС ақпарына сілтеме жасаған rast.kz хабарлайды.
«ФСБ «Параграф-88» неонацистік тобы мүшелерінің Украина қауіпсіздік қызметінің тапсырмасы бойынша RT телеарнасының бас редакторы Маргарита Симоньян мен журналист Ксения Собчакты өлтіруге бағытталған дайындықтарының алдын алды», – делінген агенттік хабарламасында.
Айтуларынша, федералды қауіпсіздік қызметі Ресей тергеу комитетімен және ішкі істер министрлігімен бірлесіп украин арнаулы қызметінің RT телеарнасының және халықаралық «Россия сегодня» ақпарат агенттігінің бас редакторы Маргарита Симоньянды өлтіру жоспарының алдын алып үлгеріпті-міс. Бұған қоса Ксения Собчакты да өлтіруге әзірлік жасалыпты.
Ресей федералды қауіпсіздік қызметіндегілер 14 шілде күні Мәскеу мен Рязань облысында екі мәнзіл (адрес) бойынша жұмыс істеп жатқан неонацистік «Параграф-88» тобының мүшелерін қолға түсіріпті.
«Тергеу әрекеттері барысында олар әрбірі үшін төленетін 1,5 млн рубль көлеміндегі ақшаны алмақшы болып іске кіріскендерін мойындады», – делінген хабарламада.
Тергеу әрекеттері барысында қолға түскендерден Калашников автоматы, 90 патрон, пышақ, кастеттер, резіңке дөңбектер, кісендер алынған.
Әзірге Украина тарапы бұл оқиғаға өздерінің қатыстары бар екенін айтқан жоқ.
Бұл шын мәнінде Ресей арнаулы қызметінің өздерінің қырағы жұмыс істеп жүргендерін дәлелдеп көрсету үшін ойлап табатын бұрыннан келе жатқан «сүйікті» кәсіптері болуы да мүмкін.
