USD
ҚЫЗЫЛОРДА. 8 шілде. Каспий теңізінің Атырау облысы аумағындағы жағалауында жанып жатқан қамыс өртін сөндіруге қатысу үшін Қызылордадан тікұшақ аттандырылды. Бұл туралы Kyzylorda-news.kz ақпарына сүйенген rast.kz хабарлайды.
Ежелгі Хазар теңізінің жағасын жайлаған қамысқа түскен өрттің аумағы 7 шілде күннің кешінде 20 гектарға жеткен.
«Өртті сөндіруге Қызылордадан су төгетін құрылғысы бар тікұшақ тартылады», – делінген ресурс хабарламасында.
Атырау облыстық төтенше жағдайлар департаментінің қоғаммен байланыс тобы хабардар еткендей, өрт сөндіру шарасы кеше таңертеңгі сағат 9:00-де басталған. Кешке дейін төтенше жағдайлар департаменті мен «Ақжайық» мемлекеттік табиға резерватының 71 қызметкері 15 техника, 2 мотопомпамен шамамен 5 гектар аумақтағы қамыс өртін сөндірген.
Байланыс тобы қамыс өртін сөндіруге жағалаудың сулы-батпақты болғаны қиындық келтіріп жатқанын атап өтті. Сол себептен, 8 шілдеде теңіз жағалауындағы өрт ошақтарын сөндіру үшін Қызылорда қаласынан су төгетін құрылғысы бар МИ-8 тікұшағын тарту жоспарланған.
«Өрт ошағының одан әрі тарауын болдырмау үшін айналасындағы жерді жыртуға соқасы бар К-700 тракторы тартылады», – деп баяндады департаменттің қоғаммен байланыс тобы.
ТЖД ақпараты бойынша, түтін теңізге қарай бағытталғандықтан, елді мекендерге қауіп жоқ.
Фото azh.kz сайтынан алынды
