USD
МӘСКЕУ. 27 маусым. Ресейдің Z-патриоттары президент Владимир Путиннің өз армиясының майдан даласында табысты соғысып жатқанына сенетініне әбден зәрәзап болды. Бұл туралы ресейлік ресурстар ақпаратына сүйенген rast.kz хабарлайды.
Пропагандистердің сорына, РФ диктаторы «арнайы соғыс операциясының» жоспар бойынша жүріп жатқанын айтудан жалықпай-ақ қойды. Бүгін, 27 маусым күні Кремльде әскери қызметкерлерді қабылдап, жиын өткізген Путин тағы өзінің қиял-ғажайып ертегісі желісіне кіріп кетіп, қисынға соқпайтын бөстекі әңгімелердің отын біраз қаузады. Ол РФ әскерлері маусым айында ғана Украина Қарулы күштерінің мыңнан (!!!) аса танкілері мен броневиктерін жойып жібергенін айтты.
Украина қорғаныс министрлігіне бітіп көрмеген мұншама танкіні Ресей оккупанттары қайдан тауып алып жүргенін бір құдай білсін. Осыған ызаланған Z-каналдар патриоттары: «Майдандағы жағдай қазір бұрынғы қай кездегіден де жақсы?! Сіз не, шынымен жынданғансыз ба?» деп ашуланып, өз көсемдерін жерден алып, жерге салуға кірісіп кетті.
Путиннің болжамы (ертегісі) бойынша, Ресей армиясы осы маусым айында украинның 259 танкісі мен 780 бронды машинасын отқа орап жіберген сияқты. Оның сөзіне қарағанда, украиндар тек өткен аптада ғана 280 техника бірлігінен айрылып қалыпты-мыс. Бірақ рашистер көсемі мұншалықты аса көрнекті «жеңістерге», әлбетте, әлдеқандай бір айғақ пен дәлел келтіріп жатпады, тап осылай аузымен опырып тұрып айта салды.
Путиннің осылай не өзі ойдан шығарып алатын, не Шойгу мен Герасимовтың өтіріктерін қылғытпай жұта беретін «табыстарын» белорус диктаторы Александр Лукашенко да бірнеше рет естіген екен. Ол бүгін бұған «вагнерліктердің» бүлігі кезінде майданда қандай жеңісті шайқастардың орын алғанын айтып мақтаныпты.
«Мені майдандағы оқиғалар жайында құлағдар етті. Оның: «Сен білесің бе, таң қалатын нәрсе, қазір майдандағы жағдай бұрынғы қай кездегіден де жақсы» деді. Мен сосын: «Көрдің бе, жағдай барлық жерде бірдей жаман емес қой» дедім», – деп әңгімеледі Лукашенко.
Ресейдің Z-арналары мынадай мәлімдемеден кейін естен танып қалғандай күй кешті. Ресейдің оккупант әскери тілшісі Егор Гузенко өз ашуын тежеп тұра алмады. «Майдандағы жағдай бұрынғы қай кездегіден де артық?! Сіз не, шынымен …. (е*анулись) қалғансыз ба? Мына мен, шынын айтсам, мына сөздер үшін бар ашу-ызамды төгіп сала жаздап, өзімді соңғы күшіммен ұстап тұрмын. Ызадан тістерім шықырлайды», – деп жазды ол.
Президент өз сөзінде Пригожиннің жалдамалыларын РФ армиясы тоқтатты деп те соғып жіберді. «Сіздер қиын жағдайда нақпа-нақ, үйлесімді әрекет жасап, өздеріңіздің Ресей халқы мен берген анттарыңызға адал екендеріңізді көрсеттіңіздер, Отан тағдыры мен оның болашағы үшін жауаптылық таныттыңыздар», – деп көпшік қойып жіберді Путин жиналған әскерилерге.
Жиында Кремльдің қожайыны сондай-ақ «Вагнер» ЖӘК-тың РФ бюджетінен қаржыландырылып келгенін мойындады. Ол Пригожиннің әскери құрылымы өткен жылы 86 млрд рубль алғанын еске түсірді.
