USD
НЬЮ-ДЕЛИ. 24 ақпан. Қазақстан палуандары Үндістан астанасында болып өткен еркін күрестен Азия чемпионатында 2 алтын және 4 қола медаль жеңіп алды. Бұл туралы Olympic.kz хабарлады.
Біздің құрамада алтын медальге Данияр Қайсанов пен Юсуп Батырмурзаев қол жеткізді.
Данияр 74 килоға дейінгі салмақта боз кілемге шықты. Ол финалда алаң иесі, үндістандық Джитендерді 3:1 есебімен ұтты. Ал 125 килоға дейінгі салмақта күш сынасқан Юсуп ақтық бәсекеде моңғол Худербулгу Дорджханданы 10:0 етіп тізе бүктірді.
Данияр Қайсанов осымен қатарынан екінші рет Азия чемпионы атанып отыр. Ол былтыр Қытайдың Сиянь қаласында өткен құрлықтық біріншілігінде де топ жарған болатын.
Қола медальдарды Дәулет Ниязбеков (65 кг), Мейіржан Әшіров (70 кг), Ілісхан Чилаев (92 кг) және Әлішер Ерғали (97 кг) секілді палуандарымыз алып қайтты.
Командалық есепте Иран құрамасы бірінші орынға шықса, Үндістан жамағаты екінші орынға көтерілді, ал Қазақстан жасағы үшінші сатыға орналасты.
Құтты болсын!
