Жақындап қалған «Вагнерден» қорыққан Путин Петербургке қашып кетті
САНКТ-ПЕТЕРБУРГ. 24 маусым. Мәскеуге жақындап келе жатқан «Вагнер» ЖӘК жауынгерлерінен қорыққан РФ президенті Владимир Путин Петербургке ұшып барды. Бұл туралы The Moscow News ақпарына сүйенген rast.kz хабарлайды.
Ресей президентінің Ил-96-300ПУ ұшағы Мәскеу уақытымен шамамен14:00 сағатта «Внуково» аэропортынан ұшып шығады. Ол Санкт-Петербург тарапын бетке ұстайды. Бірақ Тверьден өте бере, радардан жоғалып кетеді.
Борттың барып қонатын бекеті көрсетілмеген. Ил 96-300ПУ ұшағына Қарулы күштерді басқаратын жабдық орнатылған.
Ұшақ радарға ілікпей қалған аумақта президенттің Валдайдағы резиденциясы бар. «Проект» Владимир Путиннің онда Алина Кабаевамен және балаларымен бірге тұратынын баяндады. Лайнердің осында аялдап, отбасы мүшелерін ала шығуы да мүмкін еді.
Кейін «Фонтанка» президент әуе кемесінің Петербургке келіп қонғанын жазды. Бірақ онда Путин мен оның отбасы мүшелері бар-жоқ екенін ашып айтқан жоқ.
Осы тұста Владимир Путиннің елден қашпақ болғаны, Ресей күштік құрылымдарының «Вагнер» жағына шығатындары жайлы қауесет тарады.
«Мәскеуде жұмыс істейтін шенеуніктердің бір бөлігі Санкт-Петербургке жетіп алды, ал Рублевкада және басқа да элиталы аудандарда және Мәскеу төңірегінде тұратындар қиын уақытта шетелдерде бола тұрғанды жөн көріп отыр», – делінген «Диалог.ua» хабарламасында.
Президенттің баспасөз хатшысы Дмитрий Песков өз шефінің Кремльде жұмыс істеп отырғанын айтқанына қарамастан, бұған сенген адам аз. Шетел пабликтері РФ президентінің күштік құрылымдар мен халықтың өзіне деген сенімі сарқылған кезде шетелге қашып кетуді жоспарластырып қойғанын баяндап жатыр.
