Пригожин Ресейдің соғыстағы сәтсіздігінің себебін Путиннен көріп отыр
МӘСКЕУ. 23 маусым. РФ-ның «Вагнер» жеке соғыс компаниясының құрылтайшысы Евгений Приножин Ресейдің соғыстағы сәтсіздігіне Путиннің өзін өзі оқшауландырып алғаны себепші болып тұр деп санайды. Бұл туралы The Moscow News ақпарына сүйенген rast.kz хабарлайды.
«Атайлар алқынып қалды», – деді ол РФ президенті мен әскери басшылығын ишара етіп.
Пригожиннің пікірінше, Ресей үшін Украинаға басып кіру «сұмдық масқараға ұшыраудың» себебі болды, өйткені, РФ президенті Владимир Путин «арнайы операцияның бірінші күнінен өзін өзі оқшауландырып алды да, қорғаныс министрлігінің майдан даласындағы ұрыс қимылдары жөнінде шындықтың ауылынан алыс, тек қана нақты жағдай жөнінен алжастыратын жалған ақпаратына малданып отыра берді».
«Біздің елімізде қазір сол оқшаулану ахуалы әлі сақталып тұр, сондықтан шешім қабылдайтын тұлғалардан ешкім әлі күнге дейін бірге бас қосқан емес. Олардың бәрі бір-бірлерімен тек телефонмен сөйлеседі», – деді Пригожин.
«Музыканттар» басшысының айтуынша, соғыстың басында-ақ Ресей армиясының әлемдегі екінші күшті құрам емес екеніне жұрттың бәрінің көзі жеткен. «Бәрі әлдеқандай бір ғажайыптың бола қалуын күтті, әні-міне дегенше Варшаваға тастала қалатын тактикалық ядролық қаруға қарайлады. Бірақ оған бұлардың арттары тұрмады. Атайлар әлсіздік көрсетті, олар өздерінің жанға жайлы аймақтарынан шыға алмай қалды», – деп атап өтті ол.
«Қорғаныс министрлігі мен Кремльдегілер әлі де болса, соғыста жеңіп шығуға үміт артып отыр. Бірақ әскерді қалыпты жағдайдағыдай етіп басқара алмай тұрғанда, соғыста жеңіске жету мүмкін емес», – деп ағынан ақтарылды жалдамалы қарақшылардың басшысы. Сондықтан қорғаныс министрлігіне Путинді «өте мұқият түрде алдап тұруға» тура келеді.
«Президент ылғи шындыққа ешқандай сәйкес келмейтін баяндамалар алады. Күн тәртібіне екі мәселе шығарылады: оның біріншісі жердегі, екіншісі әуедегі соғыс қимылдары жөніндегі баянаттар түрінде президент үстелі үстінде жатады. Сол кезде біз 60 «Леопардтың», 3000 жау жауынгерінің жойылып кеткені жайлы ақпарды тыңдап тұрамыз», – деді Пригожин.
Ресей армиясының соғысу сапасында да мін көп. «Соғыстың алғашқы күндері Шойгу ресейлік мыңдаған солдаттың өмірін құртты. Олар армияның ең соғысуға қабілетті бөлігін жойып алды, ал соғысуға қабілеттілер өте аз еді», – деді сосын «Вагнер» басшысы.
Пригожиннің айтуынша, Украинаға қарсы бұл соғыс Шойгудың маршал атағы мен «батырдың жұлдызын» алуы үшін ғана керек болған. Бұл соғыс сондай-ақ «қазір іс жүзінде Ресейді билеп отырған олигархтар кланы» үшін қажет болған. Оның жоспарына Путиннің «құдасы» Виктор Медведчукті Украинаның президенті етіп тағайындау кірген.
Бүгін сонымен бірге Евгений Пригожиннің Ресей тергеу комитетіне Шойгу мен Герасимовтің үстінен арыз жазып, олардың соғыста солдаттарды көп қырып алудағы алатын орындарын тексеруді сұрағаны белгілі болды.
