USD
ЕКАТЕРИНБУРГ. 24 ақпан. Әлемдік деңгейдегі қазақстандық өнер жұлдызы Димаш Құдайберген кешкі сағат 21:00-де өзінің жеке концертін «Екатеринбург-ЭКСПО» залында берді. Бұл туралы rast.kz хабарлады.
Димаш Орал тауының етегіндегі бас қалаға 22 ақпан күні күндіз келді. Оны әуежайда фанаттар қоғадай жапырылып күтіп алды. Мұнда ол біршама уақыт аялдауға мәжбүр болды. Себебі, өзін қарсы алған әнсүйер қауымның, қоғамдық ұйымдардың осыған байланысты арнайы бағдарламалары бар екен.
Осымен қазақстандық әнші Ресейдің үшінші ірі қаласына аялдады. Ол концерт қойған 4 мың орындық залда бірде-бір бос орын болған жоқ. Жұрт 2500-ден 40 000 рубльге дейін баратын билеттерді содан бір күн бұрын түгел пышақ үстінен үлестіріп әкетті.
Концерт өте жанды түрде өтті. Мұның үстіне, залдағы акустиканың алдыңғы екі қалаға қарағанда да жақсы екені оның жоғары деңгейде болуына әсер етті.
Бұл жолы да бүкіл әлемдегі өнерсүйер қауым бірнеше ұйымдастырушының арқасында концертті онлайн-интернет формасында көріп отыруға мүмкіндік алды. Концерт біткен бойда оған талдаулар көбейіп кетті. Бәрінде де біздің әншіміздің өнеріне таң қалушылық бар.
Осыдан кейін Димаш Құдайберген гастрольдік турнесінде аздаған уақыт үзіліс алады.
Әзірге оған ең үлкен концерт залын ұсынған Қазан болып тұр. Бұл қаладағы «Татнефть Арена» спорт сарайында 10 500 орын болды.
Сосын 7 наурыз күні концертін Латвияның бас қаласы – Ригада жалғайды. Мұнда Димаш «Arena Riga» спорт сарайында өнер көрсетеді. Ал 9 наурызда Мәскеудегі «Мегаспорт» спорт сарайында әнсүйер қауыммен қауышады. Бұдан кейін оны Киев күтіп тұр. Бұл қаладағы Спорт сарайында ол 11 наурызда көрермен алдына шығады. Содан соң 19 наурызда Германияның Гамбург қаласындағы «Barclaycard Arena Sylvesterallee» аренасында, 21 наурызда Дюссельдорфтағы «Düsseldorf ISS DOME» залында, 25 наурызда Чехияның астанасы – Прагадағы «TipSport-Arena» спорт сарайында, 29 наурызда Германияның Штутгарт қаласындағы «Hanns-Martin-Schleyer-Halle» сарайында, ал 4 сәуірде Беларусь астанасы – Минскідегі «Минск-Аренада» көпшілікпен көзайым болады.
Осымен Димаштың Еуропаның 6 мемлекетінің 11 қаласында өтетін «Arnau toour 2020» атты гастрольдік турнесі аяқталады.
Машалла!
