Түрмеде жатқан Михеил Саакашвили саясатқа оралғанын мәлімдеді
ТБИЛИСИ. 16 маусым. Грузияның бұрынғы президенті Михеил Саакашвили түрмеде жатып, үлкен саясатқа оралғанын жариялады. Бұл туралы армянның news.am сайты дерегіне сілтеме жасаған rast.kz хабарлайды.
«Мен картвель (грузин) саясатына өте белсенді араласуға ниеттімін», – деп жазды Саакашвили Facebook-тегі өз парақшасына.
Жазбада ол өзінің неге кенеттен мұндай шешімге келіп отырғанын ашып көрсетті.
«Кеше «Ачарадан» (газеттің аты – ред.) өзім көрген Жоғарғы кеңестетегі сатқындар парады ең соңғы төзімді түгесті. Мен қазіргі денсаулық жағдайыма қарамастан, Украинадағы өзімнің іс-әрекетіммен бірге, грузин саясатына өте белсене қатысқанды жөн көріп отырмын. Біз қол қусырып, Украинаның жеңіске жетуін күтпеуіміз керек, жеңісті белсенді түрде жақындатуға тиіспіз. Мен бүгінгі күннен бастап шамам келгенінше барлық «соттарға» қатысамын. Және қашанғы кездегідей барлық ұлттық, антиресейлік, еуропалық күштерді, бірінші кезекте өзімнің негізгі партиям – «Ұлттық қозғалысты» бірлесе күресуге шақырамын», – деді Михеил Саакашвили.
