USD
ДОНЕЦК. 15 маусым. Донецк облысындағы Бахмут қаласы түбінде қаруластарымен жанжалдасып қалған РФ әскери қызметкері оларды атып тастап, кетіп қалған. Бұл туралы ресейлік ресурстар ақпарына сүйенген rast.kz хабарлайды.
«Бахмут түбінде орын алған жанжалдан кейін ресейлік әскери бес әріптесін автоматпен атып, қара «Нива» көлігіне отырып, белгісіз бағытқа кетіп қалған», – делінген хабарламада.
Ресей армиясының жауынгері Роман Болдырев Бахмут түбінде автоматпен өзінің бес қаруласын баудай түсіріп, майдан даласынан қашып кетеді.
Оқиға дүйсенбі, 12 маусым күні орын алған. Алайда ол жөніндегі ақпар бүгін ғана белгілі болып жатыр. Болдырев өзімен сөзге келіп, жанжалдасып қалған бес офицерді табанда атып тастайды.
Ресей Telegram-каналдары оқиғаның жексенбіден дүйсенбіге қараған түні Бахмут ауданы аумағында болғанын, сол жерде кіші сержант Болдыревтің полктастарымен болған ұрыс-керіс барысында таяқ жеп қалғанын атап өтеді. Бұған қатты ызаланған жауынгер олардан кек қайтаруға шешім қабылдайды. Сөйтіп, отты шепке (огневая позиция) барып, автомат алып оралады. Ол келе сала өзіне зәбір көрсеткендерге қарай автомат оғын себелейді.
Сол жерде бес қаруласын жер жастандырған кіші сержант қара түсті «Нива» көлігін айдап, белгісіз бір жаққа тартып кетеді.
Қазір РФ армиясы түгел дүрлігіп, Роман Болдыревті іздестіріп жатыр. Бірақ осы кезге дейін ол жөнінде еш сыбыс жоқ.
