Қытайда XIX Азия ойындарының алауы ресми түрде жағылды
БЕЙЖІҢ. 15 маусым. Бүгін, бейсенбі күні Қытайдың Чжэцзян провинциясындағы Лянчжу қаласында XIX Азия ойындарының алауы тұтатылды. Бұл туралы «ҚазАқпарат» ақпарына сүйенген rast.kz хабарлайды.
«2022 жылғы Азия ойындарының алауы бүгін Қытайдың шығысында, Чжэцзян провинциясындағы ежелгі Лянчжу қаласында жағылды. Бұл XIX Азия ойындарының ашылуына 100 күн қалғанын білдіреді», – делінген хабарламада.
Ойындар 2023 жылдың 23 қыркүйегінен 8 қазанынан дейін Ханчжоу қаласында өтеді.
Еске сала кетейік, XIX Азия ойындары 2022 жылдың 10-25 қыркүйегі аралығында өтуге тиіс болатын. Бірақ жарыс кейін 2023 жылдың күзіне ауыстырылды.
Азия ойындары Қытайда осымен үшінші рет өткелі отыр. Бұған дейін ол 1990 жылы Бейжіңде, 2010 жылы Гуанчжоуда ойналған болатын.
«Азия ойындары-2022» ұйымдастыру комитетінің мәліметінше, Ханчжоудағы ойындардың бағдарламасына 61 сайыстан тұратын 40 спорт түрі енген. Сондай-ақ Ойындар шеңберінде 483 шара ұйымдастырылады. Сондай-ақ осы жолы киберспорт пен брейк-денс жарыстары бірінші рет өткелі жатыр.
Азия ойындарына құрлықтың 12 мың спортшысы қатысады.
