USD
АСТАНА. 3 маусым. «SCAT» әуе компаниясы мүмкіндігі шектеулі баласы бар отбасыны рейстен түсіргені үшін әкімшілік жауапқа тартылды. Бұл туралы Halyq Uni дерегіне сүйенген rast.kz хабарлайды.
Индустриялық-инновациялық даму министрлігінің азаматтық авиация комитеті компанияның 27 мамыр күні Қостанай – Анталья бағыты бойынша ұшатын VSV–5280 рейсі кезіндегі әкімшілік құқық бұзушылық фактісін қарады. Осыған байланысты
Министрлік Әкімшілік құқық бұзушылық туралы кодекстің 571-бабын бұзғаны үшін «SCAT» әуе компаниясына қатысты әкімшілік іс қозғады.
«Жолаушылардың барлық санаттарына, оның ішінде мүмкіндігі шектеулі жолаушыларға қызмет көрсету кезінде әдеп нормаларын сақтау қазақстандық әуе компаниялардың жұмысында басымдық болуға тиіс екенін атап өтеміз», – делінген Авиация комитеті таратқан хабарламада.
«SCAT» әуе компаниясының ақпараты бойынша, жолаушыға келтірілген материалдық залал өтеліп, жақын арада жолаушылар ұсынылған туристік жолдамаға сәйкес ұшуды жоспарлайды.
Әкімшілік құқық бұзушылыққа жол берген «SCAT» әуе компаниясының қызметкерлеріне қатысты тәртіптік шаралар қабылданатын болады.
