USD
АЛМАТЫ. 22 ақпан. Оңтүстік мегаполисте бүгін таңертең полиция «Демпартияның» оннан астам белсендісін ұстап әкетті. Бұл туралы «Азаттық» хабарлады.
Белсенділер бұл кезде қаладағы Төле би мен Төлебаев көшелерінің қиылысында жиналып, «Астана» алаңына қарай шеру жасап, жүрмек болған екен. Полиция оларды ұстай бастаған сәтте белсенділер «Бостандық» деп айқайлап, Жанболат Мамайды босатуды талап етті. Содан кейін тәртіп сақшылары оларды ұстап, «газельге» отырғызып алып кеткен.
«Азаттық» тілшісіне Жанболат Мамайдың әйелі Инга Иманбай бұдан жарты сағат алдын «Демпартияның» төрт белсендісін полицияның ұстап әкеткенін хабарлаған. Олардың арасында Сайлау Лепесов, Ырысбек Тоқтасын бар көрінеді.
Әзірге ұсталған белсенділермен хабарласу мүмкін болмаған. Медеу аудандық ішкі істер басқармасының кезекшісі Жұмабеков «Азаттық» тілшісінің сұрақтарына «жауап бере алмайтынын» айтты.
Алматы қалалық полиция департаменті жауап бермеген.
Бұған дейін билік қысымына шағымданған «Демократиялық партия» бастамашыл тобы өкілдері 22 ақпанда құрылтай орнына саяси реформаны талап етіп, митингіге шығатындарын білдірген.
22 ақпанға қараған түні бастамашыл топ жетекшісі Жанболат Мамайды сот «рұқсат етілмеген митингіге шақырды» деген айыппен үш тәулікке қамады.
