Жаңалықтар жаңғырығыСпорт

«Барселона» мерзімінен бұрын Испания чемпионы атанды (видео)

МАДРИД. 15 мамыр. Футболдан Испанияның Ла-лигадағы чемпионаты аяқталуға 4 тур қалғанда, «Барселона» клубы чемпиондық атаққа қол жеткізді. Бұл туралы rast.kz хаабарлайды.

Мұндай жағдай түнде «Барселона» қонақта «Эспаньолды» 4:2 етіп ұтқаннан кейін белгілі болды. Осыдан соң команда басқа қарсыластары жете алмайтындай ұпай қорын жинап үлгерді.

Негізі, бұл екі команда – «Эспаньол» да, «Барселона» да бір қаланың, Катальония астанасы – Барселонаның командалары болып табылады. Сондықтан дерби клубтардың өзара кездесулері, олардың турнир кестесінде қандай орын алып тұрғандарына қарамастан, әрдайым өте тартысты болып өтеді.

Матч сол салттан айныған жоқ. Ойын барысында «Барселонадан» Роберт Левандовски (11,40), Алехардро Бальде (20) және Жюль Кунде (53) гол соқты. Ал «Эспаньол» құрамынан Хавьер Пуадо Диас (73) мен Хоселу (90+2) мергендіктерімен көзге түсті.

Осыдан кейін «Барселона» ұпай санын 85-ке жеткізіп, өзін өкшелеп келе жатқан Мадридтің «Реалына» (71 ұпай) қол жетпейтін жерге озып кетті. Ал Мадрридтің «Атлетикосы» (69 ұпай) содан сәл бұрын, жексенбі күні қонақта «Эльчеден» 0:1 есебімен ұтылып қалған еді.

«Барса» осымен Испания чемпионатында 27-ші мәрте чемпион атанып отыр. Ол соңғы рет мұндай атаққа 2019 жылы, Лионель Мессимен бірге қол жеткізіп еді.

 

Тағы көрсету

Пікір қалдыру

Ұқсас мақалалар

Back to top button