USD
МИНСК. 4 наурыз. Беларусь сыртқы істер министрі Владимир Макей қайтыс боларының алдында Ресейдің келесі басып алатыны белорус елі екенін айтыпты. Бұл туралы бұқаралық ақпарат құралдары хабарларына сүйенген rast.kz хабарлайды.
Министр Ресейдің бүкіл елді басып алып, өзіне қаратқалы тұрғанын айтып қалған екен. Ол империялық амбициядағы көсемі бар агрессор-мемлекеттің келесі аннексиялайтын дәулеті Беларусь болатынына ешбір шүбә келтірмеген. Мұны шенеунік өзі жұмбақ жағдайда көз жұмарынан шамалы уақыт бұрын ғана мәлімдеген.
Макей өзінің соңғы жүрекжарды сырларының бірін белорус оппозиционері Павел Латушкомен бөліскенге ұқсайды. Мұны саясаткер кейін «Radio NV»-ға берген сұхбатында баяндайды.
Латушко Беларусь сыртқы істер министрі Владимир Макейдің Финляндия сыртқы істер министрімен кездесуі барысында біраз әңгіменің ашық айтылғанын атап өтеді. Бұлардың соңғысы сол әңгіменің бүге-шігесіне дейін айтып берген екен.
Суоми өкілі кездесу үстінде Макейдің жүзінен қатты толқып, жүйкесі сыр беріп отырғаны байқалғанын алға тартыпты. Латушко бұған Владимир Макейдің 2015-2016 жылдары елші болып істеп жүргенінде әлденеше рет Александр Лукашенконы қолдауға шақырған сөздер айтқанын қосып қойды. Марқұм министр сол кезде тек Лукашенконың ғана Беларусь егемендігінің кепілі екенін, егер ол болмаса, Ресейдің елді басып алатынын айтқан көрінеді.
«Диалог.UA» хабарлағандай, 64 жастағы Владимир Макей 2022 жылғы 26 қараша күні кенеттен, күтпеген жерден қайтыс болып кеткен. Соған дейін министр ҰҚШҰ (ОДКБ) ішінде проблемалардың бар екенін ескертіп өткен екен.
Еске сала кетейік, депутат Александр Гончаренко сол кезде министр Макейдің өлімі Путиннің Лукашенкоға жасаған ең соңғы ескертуі екенін мәлімдеген болатын.
Ескерту!
rast.kz сайтының кез келген материалын редакцияның арнайы рұқсатынсыз көшіріп алып жариялауға тыйым салынады
